Կառավարությունը չի խոսում թանկացումների մասին, որպեսզի թանկացումները չգան, բայց դրանք գալու են. Նիկոլ Փաշինյան
2018 թվականը լինելու է թանկացումների տարի: Այս մասին այսօր` դեկտեմբերի 6-ին, ԱԺ 2018 թվականի բյուջեի նախագծի քննարկման ժամանակ ասաց «Ելք» խմբակցության պատգամավոր Նիկոլ Փաշինյանը:
«Սա միանշանակ ընդունում է նաև Կառավարությունը, որովհետև բյուջեի նախագծով 2018 թվականի գնաճը կանխատեսվել է 4 տոկոս: Սա վերջին տարիների գնաճի ամենաբարձր կանխատեսումն է և շատ մեծ է հավանականությունը որ այդ կանխատեսման իրականությունը ավելի մեծ կլինի: Ընդ որում այսօր որոշ ապրանքներ արդեն թանկացել են»,-ասաց պատգամավորը:
Նիկոլ Փաշինյանը մանրամասնեց, որ կարագը թանկացել է շուրջ 39 տոկոսով, խոզի միսը շուրջ 40 տոկոսով, տավարի միսը շուրջ 20 տոկոսով, բենզինը 8 տոկոսով և այլն:
Պատգամավորի խոսքով` եկող տարվա թանկացումներն անխուսափելի են, քանի որ կապված են 2 գործոնի հետ:
«Դրանցից մեկը շուրջ 700 անուն ապրանքների մասով ԵՏՄ նոր մաքսատուրքերի ուժի մեջ մտնելն է, 2-րդը հարկային նոր օրենսգիրքը, որովհետև շատ հարկատեսակների հետ կապված մeնք ավելացում ունենք: 2018-ի այսպիսով սպասվում է օղու, ծխախոտի, բենզինի, սեղմված գազի, հավի մսի, ձկան, շաքարավազի, բուսական յուղի, թեյի, սուրճի, դեղորայքի և բազմաթիվ այլ ապրանքների թանկացումներ»,-ընդգծեց Փաշինյանը:
Նրա կարծիքով` Կառավարությունը այս թանկացումների նկատմամբ «խորը արհամարհանք» է դրսևորում. «Ինչպես ընդունված է ասել մի շարք պաշտոնական միջավայրերում առ է համարում այս իրավիճակը, թերև նկատի ունենալով նախկին վարչապետ Տիգրան Սարգսյանի պատգամը, որ ասում էր՝ չխոսենք ճգնաժամի մասին, որպեսզի ճգնաժամը չգա: Հիմա Կառավարությունը չի խոսում թանկացումների մասին, որպեսզի թանկացումները չգան: Ընդ որում այս արհամարհանքը ոչ թե պաշատոնական է այլ շատ կոնկրետ, քանի որ կենսաթոշակները չեն բարձրանում, սոցիալական նպաստները չեն բարձրանում, բյուջետային հիմնարկների աշխատավարձերը չեն բարձրանում և այլն»:
Պատգամավորի խոսքով` սա իրենց համար անընդունելի մոտեցում է. «Բայց եկեք ծուռը նստենք, դուզը խոսենք, եթե հաշվի առնենք այս կառավարության, գործող իշխանության ծագումնաբանությունը, ապա սա շատ տրամաբանական մոտեցում է»,-հավելեց Փաշինյանը: