Ինչո՞ւ կարճվեց «Ճաճոյի որդու» սպանության գործը. հարցազրույց Լոռու մարզի դատախազի հետ
Լոռու մարզի դատախազ Արսեն Մարտիրոսյանը NEWS.am-ին տված հարցազրույցում մանրամասնել է, թե ինչ հիմքով է կարճվել Վանաձորում քրեական հեղինակություն համարվող «Ճաճոյի Էդոյի» որդու սպանության գործը:
Պարոն Մարտիրոսյան, նախօրեին հայտնի դարձավ, որ Ձեր որոշմամբ, Տիգրան Մարտիրոսյանի սպանության գործը կարճվել է: Ինչո՞ւ նման որոշում կայացվեց:
Քանի որ գործի որոշ հանգամանքներ արդեն հայտնի են դարձել հանրությանը, թույլ տվեք դրանց չանդրադառնալ: Նշեմ միայն, որ քրեական գործը մեղադրական եզրակացությամբ 2017թ. նոյեմբերի 24-ին է ստացվել Լոռու մարզի դատախազություն: Նոյեմբերի 28-ին այդ քրեական գործի քննության օրինականության նկատմամբ դատավարական հսկողություն իրականացնող դատախազը որոշում է կայացրել կարճել քրեական գործի վարույթը եւ Լիանա Կիրակոսյանի նկատմամբ քրեական հետապնդումը դադարեցնել՝ վերջինիս գործուն զղջալու հիմքով:
Քանի որ գործ ունենք մահվան ելքով դեպքի, ըստ էության, սպանության հետ, տարընթերցումներից խուսափելու համար թերեւս հարկ է մի փոքր պարզաբանել, թե որոնք են եղել դատախազի նման որոշման հիմքերը:
Նախեւառաջ հիմք է հանդիսացել այն հանգամանքը, որ հիշյալ հանցագործությունը դասվում է միջին ծանրության հանցագործությունների շարքին: Ըստ ՀՀ քրեական օրենսգքրի 108-րդ հոդ-վածի, որով առաջադրվել էր մեղադրանքը, անհրաժեշտ պաշտպանության սահմանազանց-մամբ սպանությունը պատժվում է ազատազրկմամբ՝ առավելագույնը երեք տարի ժամկետով:
Իսկ ՀՀ քրեական օրենսգքրի 19-րդ հոդվածի 3-րդ մասի համաձայն՝ միջին ծանրության հանցագործություններ են համարվում դիտավորությամբ կատարված այն արարքները, որոնց համար սույն օրենսգրքով նախատեսված առավելագույն պատիժը չի գերազանցում հինգ տարի ժամկետով ազատազրկումը: Ինչպես նաեւ՝ անզգուշությամբ կատարված այն արարքները, ո-րոնց համար նախատեսված առավելագույն պատիժը չի գերազանցում տասը տարի ժամկետով ազատազրկումը:
Բացի դրանից՝ ՀՀ քրեական օրենսգքրի 72-րդ հոդվածի 1-ին մասի համաձայն՝ առաջին անգամ ոչ մեծ ծանրության կամ միջին ծանրության հանցանք կատարած անձը կարող է ազատվել քրեական պատասխանատվությունից, եթե նա հանցանք կատարելուց հետո կամովին ներկայացել է մեղայականով, աջակցել է հանցագործությունը բացահայտելուն, հատուցել կամ այլ կերպ հարթել է հանցագործությամբ պատճառված վնասը:
Միաժամանակ, ՀՀ քրեական դատավարության օրենսգրքի 37-րդ հոդվածի 3-րդ մասը սահմանում է, որ Հայաստանի Հանրապետության քրեական օրենսգրքի 72-րդ եւ 74-րդ հոդվածներով նախատեսված դեպքերում գործի վարույթի կարճում եւ քրեական հետապնդման դադարեցում չի թույլատրվում, եթե դրա դեմ առարկում է այն անձը, ում նկատմամբ իրականացվում է քրեական հետապնդումը։
Ինչո՞ւ կարճման որոշումը կայացվեց նախաքննության ավարտից հետո:
Ինչպես գիտեք, ՀՀ քրեական դատավարության օրենսգքրի 37-րդ հոդվածի 1-ին մասի համաձայն՝ դատարանը, դատախազը, ինչպես նաեւ դատախազի համաձայնությամբ՝ քննիչը, կարող են հարուցված քրեական գործի վարույթը կարճել եւ քրեական հետապնդումը դադարեցնել ՀՀ քրեական օրենսգքրի 72-րդ, 73-րդ եւ 74-րդ հոդվածներով նախատեսված դեպքերում: Տվյալ դեպքում իրականացվել է ծավալուն, բազմակողմանի, օբյեկտիվ քննություն, որի արդյունքներից ելնելով՝ օրինականության նկատմամբ դատավարական հսկողություն իրականացնող դատախազն է օգտվել այդ իրավասությունից եւ կայացրել քրեական գործը կարճելու եւ մեղադրյալի նկատմամբ քրեական հետապնդումը դադարեցնելու մասին որոշումը: Հարկ եմ համարում ընդգծել, որ քրեական հետապնդումը դադարեցվել է ոչ արդարացնող հիմքով:
Պարոն Մարտիրոսյան, քրեական գործը կարճվել է գործուն զղջալու հիմքով: Ինչ իրողություններով է հիմնավորվել կատարած հանցավոր արարքի համար գործուն զղջումը:
Հաշվի են առնվել Լիանա Կիրակոսյանի կատարած հանցագործության վտանգավորության աստիճանը, բնույթը, պատասխանատվությունը եւ անշուշտ պատիժը մեղմացնող հանգա-մանքների առկայությունն ու ծանրացնող հանգամանքների բացակայությունը:
Հաշվի է առնվել նաեւ, որ Լիանա Կիրակոսյանն առաջին անգամ է կատարել միջին ծանրության հանցանք, եւ դա տեղի է ունեցել տեւական ժամանակ տուժողի հակաօրինական եւ հակաբարո-յական վարքագծով պայմանավորված եւ որ խնամքին ունի անչափահաս 2 երեխա:
Հանցանքը կատարելուց հետո Լիանա Կիրակոսյանը կամովին մեղայականով ներկայացել է ի-րավապահներին, խոստովանել է կատարածը, ներկայացրել հանցագործության գործիք հան-դիսացած ատրճանակը: Նախաքննության ընթացքում տվել է ճշմարտացի ցուցմունքներ եւ ա-ջակցել է հանցագործության բացահայտմանը, որոնցով դրսեւորվել է գործուն զղջալու հանգամանքը: Միաժամանակ, 27.11.2017թ. Լոռու մարզի դատախազին հասցեագրված դիմում-խնդրանքով կրկին հայտնել է, որ ընդունում է մեղքը, ափսոսանք է հայտնել կատարվածի վերաբերյալ, զղջացել է եւ խնդրել օրենքով նախատեսված որեւէ հիմքով դադարեցնել իր նկատմամբ հարուցված քրեական հետապնդումը: Մյուս կողմից տուժողի իրա-վահաջորդը որեւէ բողոք կամ պահանջ չի ներկայացրել:
Ահա այս ամենի արդյունքում էլ կայացվել է Լիանա Կիրակոսյանի նկատմամբ քրեական հետապնդումը դադարեցնելու որոշումը: