Մնում է` ինքնամեդալ ստանան. ինչ է կատարվում Երևանի քաղաքապետարանում

Տարեվերջին պետական հիմնարկների աշխատակիցները մեկ ամսվա աշխատավարձի չափով պարգևավճարներ են ստանում, ինչը ընդունված է անվանել 13-րդ աշխատավարձ:

«Ժողովուրդ» օրաթերթը Երևանի քաղաքապետ Տարոն Մարգարյանի անցած տարվա պարգևատրումների կարգադրությունից տեղեկացավ, որ քաղաքապետի և նրա տեղակալների գլխավորությամբ այդ հիմնարկի 1 հազար 220 աշխատակիցներ պարգևավճարներ են ստացել: Երևանի քաղաքապետը համապատասխան կարգադրությունն անցած տարի ստորագրել է դեկտեմբերի 23-ին:

Ըստ այդմ, փաստաթղթից տեղեկանում ենք, որ քաղաքապետարանի աշխատակազմը, ղեկավարվելով ՀՀ աշխատանքային օրենսգրքի 219-րդ հոդվածի 1-ին մասի 2-րդ կետով և «Համայնքային ծառայության մասին» ՀՀ օրենքի 31-րդ հոդվածի 1-ին մասի «բ» կետով, հաշվի առնելով Երևանի քաղաքապետարանի աշխատակիցների կողմից իրենց աշխատանքային և ծառայողական պարտականությունները բարեխիղճ կատարելու հանգամանքը, աշխատակիցներին խրախուսել է միանվագ դրամական պարգևատրմամբ մեկամսյա աշխատավարձի չափով:

Սա իրականացվել է Երևանի 2016 թվականի բյուջեով նախատեսված պարգևատրման ֆոնդի հաշվին: Իսկ քաղաքապետարանի աշխատակազմի սոցիալական ծառայությունների և քաղաքացիական կացության ակտերի գրանցման տարածքային բաժինների աշխատակիցները խրախուսվել են միանվագ դրամական պարգևատրմամբ ոչ ավել, քան մեկամսյա աշխատավարձի չափով Երևանի 2016թ. բյուջեով բաժինների համար նախատեսված աշխատավարձի ֆոնդի տնտեսումների հաշվին: Ցուցակից պարզ է դառնում, որ պարգևատրվողների ցանկում տեղ են գտել ինչպես քաղաքապետ Տարոն Մարգարյանը, այնպես էլ նրա չորս տեղակալները:

Քաղաքապետարանի ղեկավար կազմի այդ ցուցակում ընդգրկվելը ուշագրավ է, որովհետև այդ նույն մարդիկ իրենց պաշտոնավարման ընթացքում հասցրել են հսկայական կարողություն կուտակել, և նրանց ընտանիքների մեկ օրվա ծախսը վաղուց գերազանցում է իրենց աշխատավարձը: Չնայած, մյուս կողմից էլ ով գիտի, մի գուցե նրանց ունեցվածքի մասին լեգենդները սուտ են, և Երևանի քաղաքապետարանի ղեկավարությունն աշխատավարձով է ապրում, և եթե այդ գումարները չստանան, միգուցե չկարողանան Ամանորը նշել: Ինչևէ:

Ըստ այդ փաստաթղթի` Երևանի քաղաքապետարանի 1220 աշխատողի որպես պարգևատրում նախորդ տարեվերջին վճարվել է ընդհանուր 271 մլն 777 հազար 300 դրամ: Ինչպես արդեն նշեցինք՝ ցուցակը գլխավորում է Երևանի քաղաքապետ Տարոն Մարգարյանը: Ասել է, թե Երևանի քաղաքապետ Տարոն Մարգարյանն ինքն իրեն պարգևատրել է 575 հազար դրամով` «ծառայողական պարտականությունները բարեխիղճ կատարելու համար»: Հետաքրքիր կլիներ, եթե նա որոշեր, որ իր պարտականությունները բարեխիղճ չի կատարել: Իհարկե, Տարոն Մարգարյանը կարող էր համեստորեն տեղ չգտնել այդ ցուցակում՝ իր տեղակալներին էլ կոչ անելով իր օրինակին հետևել, բայց, դե, փաստը մնում է փաստ, մարդիկ ամսական մի քանի տասնյակ հազար դոլար են ծախսում՝ իրենց ճոխ կենցաղը վարելու համար, բայց չեն խորշում համայնքի բյուջեից պարգևավճար ստանալ:

Մանրամասները՝ այստեղ.