Իսրայելում 6-րդ դարի վրացական եկեղեցի են գտել

Իսրայելի միջերկրածովյան ափում հնագետները հայտնաբերել են վրացական տաճարի ավերակներ: Նրանց կարծիքով՝ գտածոն մոտ հազար հինգ հարյուր տարեկան է: Այս մասին հայտնում է երկրի հնությունների վարչությունը:

Աղբյուրի հաղորդմամբ՝ պեղումների միջոցով բացահայտելով Աշդոդ Յամ քաղաքը, գիտնականները գրություն պարունակող խճանկարային հատակ են գտել, որն արված է հունարենով, սակայն վրացական հնագույն ժամանակագրային համակարգը թույլ է տվել հետազոտողներին ոչ միայն թվագրել կառույցը, այլ նաև որոշել՝ ում է այն պատկանել:

Երուսաղեմի Հրեական համալսարանի դոկտոր Լեյա Դի Սեգնին գրության մեջ հիշատակված 292 թվականը վերծանել է որպես մեր թվարկության 539 թվական:

Գիտնականների խոսքով՝ իրենց լավ հայտնի են նույն դարաշրջանի վրացական կառույցները, որոնք տեղակայված են այդ վայրից տասնյակ կիլոմետրեր դեպի արևելք ընկած տարածքում, Երուսաղեմում և դրա արվարձաններում, սակայն Իսրայելի միջերկրածովյան ափում ասպիսի գտածոներ դեռ չեն եղել:

«Պատմական աղբյուրների համաձայն՝ Աշդոդ Յամում իր կյանքի վերջին տարիներն անցկացրել է հայտնի վրացի իշխան և եպիսկոպոս Պյոտր Իվերը: Այժմ հավանաբար գտել ենք այն ազդեցության ապացույցը, որը նա գործել է այս քաղաքի վրա», - ասվում է Իսրայելի հնությունների վարչության կայքում:

Հայտնի է, որ հինգերորդ դարում ապրած Իվերը հիմնել է առաջին վրացական վանքը Բեթղեհեմում: