Նժդեհին միշտ էլ հերոսացնելու ենք. Գալուստ Սահակյանի արձագանքը` ռուսական հեռուստաալիքին
Armlur.am-ը գրում է. Նոյեմբերի 19-ի երեկոյան ռուսական դաշնային «Звезда» հեռուստաալիքի «Прогнозы с Вероникой Крашенинниковой» հաղորդման ժամանակ հաղորդավարը քննադատել է պաշտոնական Երևանին ԵՄ-ի հետ ասոցացման պայմանագիր կնքելու ցանկության համար՝ Հայաստանի ճանապարհը համեմատելով ուկրաինականի հետ:
Սակայն չսահմանափակվելով այդքանով՝ հաղորդավարուհին անդրադարձել է Գարեգին Նժդեհին, ապա իշխող ՀՀԿ-ին և վերջինիս խորհրդանիշը համեմատել Ադոլֆ Հիտլերի գլխավորած Ազգային սոցիալիստական աշխատանքային կուսակցության, ասել է, թե նացիստների զինանշանի հետ: Նախ նկատենք, որ «Զվեզդա»-ն պատկանում է Ռուսաստանի Դաշնության պաշտպանության նախարարությանը, իսկ հաղորդավարուհին՝ Վերոնիկա Կրաշեննիկովան, Ռուսաստանի իշխող՝ «Եդինայա Ռոսիա» կուսակցության բարձրագույն խորհրդի անդամ է:
Այլ կերպ ասած՝ «Զվեզդան» ՌԴ պաշտոնական տեսակետը ներկայացնող ռուսական հեռուստաալիքներից մեկն է: Հիշեցնենք, որ Գարեգին Նժդեհի հետ կապված այսպիսի մի դեպք էր գրանցվել նաև նախորդ տարի, երբ ՌԴ ԱԳՆ պաշտոնական ներկայացուցիչ Մարիա Զախարովան անդրադարձել էր Երևանում Գարեգին Նժդեհի արձանի տեղադրմանը և ընդգծել, թե Մոսկվան զարմացած է Երևանում Վերմախտի «Հայկական լեգիոնի» հիմնադիրներից մեկի՝ գեներալ Գարեգին Նժդեհի արձանի տեղադրմամբ»:
Հավելենք, որ ավելի ուշ հաղորդման տեսանյութը ջնջվել էր համացանցից: Այս և այլ հարցերի շուրջ «Ժողովուրդ» օրաթերթը զրուցել է ՀՀԿ փոխնախագահ, ԱԺ պատգամավոր Գալուստ Սահակյանի հետ:
-Պարո՛ն Սահակյան, ռուսական դաշնային հեռուստաալիքն անդրադարձել է ՀՀ-ԵՄ համաձայնագրի ստորագրմանը, որի ժամանակ նաև քննադատել է Գարեգին Նժդեհին և Ձեր կուսակցությանը:
-Այդպիսի քննադատությունը նոր չէ, նախկինում էլ է եղել: Վերջին հաշվով լրագրողներ են, ովքեր որոշակի ոչինչ չներկայացնող փաստեր են ներկայացնում: Նժդեհն ինքը գրականագետ է, բարձր գրականագետ, ազգասեր, ազգագրագետ: Նժդեհին տեսնում եմ միայն որպես զորավար:
Բազմակարող, բազմիմաստ անձնավորություն է, և որևէ մեկը, եթե Նժդեհից էր խոսում, դա ինչ-որ չափով ազդում էր մեզ վրա, բայց մենք արդեն սովորել ենք: Մենք դեռևս 90-ական թվականներից առաջ Նժդեհով մտանք քաղաքականության մեջ: Մեր Նժդեհի գաղափարախոսությունը, բնականաբար, նաև կիսում ենք:
-Այդ հաղորդման ժամանակ նշվում է, թե ՀՀԿ-ի խորհրդանիշը նման է Ադոլֆ Հիտլերի գլխավորած Ազգային սոցիալիստական աշխատանքային կուսակցության զինանշանին:
-Գիտեք՝ դրանք բոլորը հիմար երևույթներ են, որովհետև Նժդեհն ինքն իր կարողություններով նաև պայքարել է նաև գերմանացիների դեմ, նաև կյանքի վերջում սովետական զինված ուժերին դիմեց, որպեսզի որոշակի գործողություններ կատարվեն Թուրքիայի համար: Այնպես որ որևէ բան չի կարող կպչել Նժդեհին: Իհարկե, մենք վատ ենք զգում, բայց դա այդպես քաղաքականության մեջ անհիմն, պատահական մի երևույթ ենք համարում:
Խորհրդանիշը մեր քաղաքական անցյալի, պատմության մեր խորհրդանիշներից մեկն է, և մենք այդ խորհրդանիշով ենք մտել և դարձրել ենք մեր կուսակցության հիմնական խորհրդանիշը: Դա որևէ այլ կուսակցության, դա լինի գերմանական կամ որևէ այլ երկրի, որևէ մեկի հետ դա երբեք չի առնչվում: Գոնե պետք է ռուսները մտածեն, որ հայերը, ըստ էության, իրենց նպատակադրումների մեջ դրական հարաբերություններ ունեն այլ ազգերի նկատմամբ: Այնպես որ, ֆաշիզմի հետ կապել մեզ, դա անհիմն հերյուրանք է:
-Սակայն առաջին անգամը չէ, երբ ռուսական կողմից նման արձագանք է լինում: Նախորդ անգամ էլ եղավ Երևանում՝ Գարեգին Նժդեհի արձանի տեղադրման ժամանակ, այն էլ ՌԴ ԱԳՆ պաշտոնական ներկայացուցչի կողմից:
-Հասկանալի է, լրագրողներ են, աշխատում են, և չեմ էլ մտածում, որ դա Ռուսաստանի պետության խնդիրն է: Դա առանձին մարդկանց ինչ-որ խնդիրներ են, որոնց մենք պատասխանում ենք: Դուք անընդհատ ասում եք՝ ռազմավարական, դուրս է գալիս՝ Ռուսաստանի իշխանություններն են անում: Մենք անընդհատ խոսում ենք ռազմավարական գործընկերության մասին, սակայն մենք անընդհատ մեր քաղաքականությունն առաջ ենք տանում, հիմա այն խնդիրները, որոնք կապված են մեր հարևանների, մասնավորապես ՌԴ-ի հետ, փորձում ենք լուծումներ տալ:
Իսկ ինչ վերաբերում է Նժդեհի արձանի տեղադրմանը, ապա մենք միշտ էլ հերոսացնելու ենք Նժդեհին, նա մեր գաղափարախոսն է, նա բարձր կարգի որակավորում ունեցող անհատ է, շատ լավ պատկերացնում է մեր ազգի ճակատագիրը, մեր ազգի ըմբռնումները, և մենք գնում ենք այն Հայաստան, որը, ըստ էության, կարողացել է ներկայացնել Նժդեհը, իսկ այդ Հայաստանը որևէ պետության նկատմամբ թշնամանք չի կարող ունենալ: