Վանաձորի քաղաքապետի եւ ՀՎԿ-ի միջեւ համագործակցության հուշագիր է ստորագրվել. բոյկոտը դադարեցվեց
Araratnews.am-ի ունեցած հավաստի տեղեկություններով Վանաձորի քաղաքապետ Մամիկոն Ասլանյանի եւ Վանաձորի ավագանու «Հայկական Վերածնունդ» խմբակցության միջեւ ստորագրվել է համագործակցության հուշագիր, ինչն էլ ենթադրում է, որ նախորդ տարվա հոկտեմբերի 2-ից ավագանու նիստերը բոյկոտած ՀՎԿ խմբակցության անդամները այսուհետ կմասնակցեն ավագանու նիստերին: Սույն տեղեկատվությունը մեզ հետ զրույցում հաստատեց Վանաձորի քաղաքապետ Մամիկոն Ասլանյանը: «Ես կոչով դիմել էի ավագանու բոլոր խմբակցություններին, եւ մեկ անգամ եւս հորդորել որ հանուն Վանաձորի ապագայի եւ վանաձորցիների միավորվեն, գան մասնակցեն կառավարում իրականացնեն: Այսօր հանդիպել եւ համագործակցության հուշագիր ենք ստորագրել, քանի որ Վանաձորն ունի խնդիրներ, եւ այդ խնդիրներն անձնավորված չեն, եւ անգործությունը չէ, որ Վանաձորը տանելու առաջ, այլ գործողությունները, եւ դրանք պետք է կոնսենսուսով լինեն, որպեսզի քաղաքի առաջ ծագած խնդիրները կարգավորվեն»,- ասաց քաղաքապետը:
Նշենք, որ 2016 թվականի Վանաձորի ՏԻՄ ընտրություններից հետո, «Հայկական Վերածնունդ», ԲՀԿ եւ «Լուսավոր Հայաստան» խմբակցությունները բոյկոտել էին ավագանու նիստերը: «Իհարկե ավագանու նիստերին կմասնակցեն եւ քաղաքի առջեւ ծառացած խնդիրները կլուծենք»,- ասաց Վանաձորի քաղաքապետը, հավելելով, որ մեկ անգամ չէ, որ համագործակցության առաջարկ է արել բոլոր խմբակցություններին: «Թող գան իրենց լիազորությունները, նրանք ժողովրդի քվեն ստացած քաղաքական ուժեր են, եւ միասին առողջ աշխատանքի արդյունքում կարողանանք խնդիր լուծենք»,- ասաց Մամիկոն Ասլանյանը: