ՀՀԿ-ն եւ ՀՅԴ-ը՝ կողմ, «Ելքն» ու «Ծառուկյան» խմբակցությունները՝ դեմ բյուջեի նախագծին
ԱԺ-ում 2018 թվականի բյուջեի նախագծի քննարկումներին ԱԺ խմբակցությունների անունից հնչեցին ելույթներ, որոնցից պարզ դարձավ՝ բյուջեի նախագծին կողմ կքվեարկեն ՀՀԿ-ն ու ՀՅԴ-ը, դեմ՝ «Ծառուկյան» և «Ելք» խմբակցությունները։ «Զգացական, ամբոխավարական գնահատականները եթե մի կողմ թողնենք, ապա կմնան թվերն ու փաստերը, որոնք վկայում են կառավարության՝ երկիրը կայունացնելու և տնտեսական զարգացման հիմքեր ստեղծելու կամքն ու ջանքը: Սա է այս բյուջեի փիլիսոփայությունը»,- ասաց ՀՅԴ խմբակցության քարտուղար Աղվան Վարդանյանը:
«Ծառուկյան» խմբակցության անունից ելույթ ունեցավ ԱԺ փոխնախագահ Միքայել Մելքումյանը: Նրա խոսքով՝ մեր երկրում սոցիալական բևեռացումը մեծ է, տնտեսական վիճակը՝ վատ:
Մելքումյանը հարց ուղղեց՝ ինչպե՞ս է, որ ունևորները կարողանում են իրենց ժառանգներին իրենց հսկայական նյութական միջոցները փոխանցել, մինչդեռ կառավարությունը մեկ միլիոնից ավելի իր քաղաքացիներին նույնիսկ չի կարողանում ոչ նյութական օգնություն ապահովել, իսկ ոչ նյութական ասելով՝ նկատի ուներ որակյալ կրթություն եւ առողջապահություն:
ՀՀԿ խմբակցության ղեկավար Վահրամ Բաղդասարյանն էլ ասաց, թե բյուջեի այս նախագծով փորձում են ստվերը կրճատել ու գործարար միջավայրի հավասարությունն ապահովել: «ՊԵԿ-ը հավասար դաշտ է ուզում ստեղծել, իսկ իրենք փորձում են խոչընդոտել այդ հավասարությունը և այն էլ՝ մեկ «մոլի» պատճառով»,- ասաց Բաղդասարյանը՝ ակնարկելով «Առինջ մոլին», որի առեւտրականները դժգոհում են ՊԵԿ-ի գործունեությունից:
«Ելք» խմբակցության պատգամավոր, նախկին վարչապետ Արամ Սարգսյանն էլ ասաց, որ բյուջեի այս նախագծի վրա չարչարվել է ֆինանսների նախարար Վարդան Արամյանը, սակայն բյուջեի նախագծում չկա մի դրույթ, որը կստիպի իրեն կողմ քվեարկել: