Ոչ թե նպաստ ու թոշակ բարձրացվի, այլ մարդկանց աշխատելու հնարավորություն տրվի. Նախարար

2018 թվականի բյուջեով թոշակները, նպաստները, նվազագույն աշխատավարձը չեն ավելանալու: Դրան զուգահեռ առողջապահությանն ուղղվող ծախսերը կրճատվել են 5 մլրդ, սոցիալական ոլորտի ծախսերը՝ 300 մլն, իսկ կրթության ծախսերը՝ 700 մլն դրամով: Աճելու է արտաքին պարտքը: Այսօր խորհրդարանում այս մասին բարձրաձայնեց պատգամավոր Նիկոլ Փաշինյանը:

«Ընդ որում, դուք հիմա վերցնում եք նույնքան պարտք, որքան վերցվել է ձեր նկարագրած ցնցումային տարիներին: Սրան զուգահեռ գներն աճում են, և 2018 թվականը լինելու է ամենամեծ գնաճով տարին վերջին տարիների համեմատ: Սա նշանակում, որ աղքատներն ավելի են աղքատանալու, մարդիկ առնվազն 10 տոկոսով ավելի վատ են ապրելու հաջորդ տարի»,- ասաց Փաշինյանը:

Ի պատասխան ֆինանսների նախարար Վարդան Արամյանն ասաց, որ սովորաբար բյուջեն կազմվում է ոչ թե մեկ տարվա համար, այլ տեսադաշտում պետք է ունենալ 3-5 տարիներ:

«2013 թվականին Հայաստանում միջին թոշակը եղել է 30 հազար դրամ, այսօր դա 41 հազար դրամ է, աճը կազմում է 30 տոկոս: Բավարա՞ր է դա, որպեսզի մեր թոշակառուները իրենց լավ զգան, իհարկե, բավարար չէ: Գնաճի մասով երբ որ դուք հնչեցնում եք, 2014-2016 թվականների կուտակային գնաճը եղել է 5.3 տոկոս: Նախորդ տարիներին այն բարձրացումները, որոնք տեղի են ունեցել թոշակների մասով, ավելի առաջանցիկ են, քան գնաճը: Նույնը նաև նվազագույն աշխատավարձին է վերաբերում, 2012 թվականից նվազագույն աշխատավարձն աճել է մոտ 60 տոկոսով:

Մենք շատ պարզ բան ենք ասում՝ 2018 թվականի համար մենք սահմանափակ ռեսուրսներ ունենք: Մենք պետք է փորձենք այդ ռեսուրսների շրջանակում տեղավորվենք: Մենք պետք է որոշենք, թե ինչ անել՝ գնում ենք այն տարբերակով, որ շարունակելու ենք նախորդ տարիների այս սոցիալական քաղաքականությունը, բարձրացումները… Մենք նախորդ տարիներին բարձրացրել ենք, պետք է մի փոքր դադար տանք, որ այդ բարձրացումները մարսենք, որովհետև դա համընկել է 2014-2016 թվականների շոկերի հետ: Որպեսզի այդ շոկերից դու դուրս գաս, պետք է տնտեսությունդ աճի»,- ասաց նա:

Ըստ նրա՝ կառավարության նպատակը հետևյալն է՝ պետք է պայմաններ ստեղծել, որ ոչ թե նպաստ ու թոշակ բարձրացվի, այլ մարդկանց աշխատելու հնարավորություն տրվի:
Նիկոլ Փաշինյանը արձանագրեց. «Ձեր ասածից դուրս եկավ, որ մենք նախորդ տարիներին էնքան բան ենք արել, որ հեղեղել ենք մեր հանրությանը ապահովության գործիքներով, որ հիմա պետք է թողենք մի քիչ հետ գաք»:

Նախարարն ասաց, որ աղքատության տոկոսը 2015 թվականին 29.8 տոկոս է եղել, նախորդ տարվա թվերը դեռ չկան: Իսկ 2015-ի ցուցանիշի վրա ազդել է տրանսֆերտների կտրուկ նվազումը, ինչն այդ տարի շուրջ 34 տոկոս անկում էր ունեցել:

«Մենք այլ բան ենք ասում՝ ինչպես անել, որ այդ սոցիալական լարված վիճակը նվազի, լավագույն տարբերակը աշխատետեղեր ստեղծելն է, որպեսզի եկամուտ գեներացվի», ասաց նա: