Պետք չէ սենսացիաներ փնտրել, քաղաքական մեծամասնությունը սատարում է Վիգեն Սարգսյանին՝ Զինապարտության մասին օրենքի հարցում. Է. Շարմազանով
Tert.am-ի հետ զրույցում ՀՀԿ խոսնակ Էդուարդ Շարմազանովն անդրադառնում է ուրբաթ ԱԺ պաշտպանության, ներքին գործերի ու ազգային անվտանգության մշտական հանձնաժողովում քվորումի բացակայությանը, այն գիշերով ապահովելուն, վանաձորյան ճգնաժամին ու ՍԴ որոշմանը, նաև հարցին, թե ինչ պետք է անի Մամիկոն Ասլանյանը:
-Պարո՛ն Շարմազանով, ուրբաթ երեկոյան ԱԺ Պաշտպանության, ներքին գործերի, ազգային անվտանգության հանձնաժողովում քվորում չապահովվեց, որը` որպես գլխադասային հանձնաժողով, պետք է եզրակացություն տար տարկետման իրավունքի սահմանափակման մասին աղմկահարույց օրենքի մասին, ապա ուշ երեկոյան ապահովվեց գիշերային նիստ՝ առաջիկա քառօրյային ընդառաջ: Նկատենք, որ այս օրինագծի հետ կապված տարաբնույթ մեկնաբանություններ կան, որ շարժումը քաղաքականացվում է, այլ մեկնաբանություններ էլ կան: Արդյոք ՀՀԿ մեծամասնությունը հնարավորություն չունե՞ր քվորում ապահովելու:
-Մեկնաբանում եմ արդյունքները, ոչ թե գործընթացը: Իսկ արդյունքը հետևյալն է. տեղի է ունեցել նիստ, նիստում քվորում եղել է, և օրենքը դրական եզրակացությամբ մտնում է քառօրյայի օրակարգ: Մնացած հարցերն արդեն երևակայության ժանրից են: Քաղաքական մեծամասնությունը պաշտպանում է այս օրենսդրական նախաձեռնությունը, քաղաքական մեծամասնության անունից և՛ ես, և՛ ֆրակցիայի ղեկավարը, և՛ այլ հանրապետականներ ամբիոնից ասել են: Իսկ ես, մասնավորապես, Գործադիր մարմնի նիստից հետո նշել եմ, որ մեր հարգարժան ուսանողների դասադուլը չի ազդել մեր քաղաքական դիրքորոշման վրա, որն առնչվում է Զինապարտության օրենքին, ու այստեղ կարիք չկա ավելորդ սենսացիաներ փնտրելու: Կրկնում եմ՝ արդյունքն այն է, որ տեղի է ունեցել արտահերթ նիստ և եղել է քվորում:
-Բայց ի սկզբանե պարզ չէր, որ երեկոյան ժամը վեցին` ուրբաթ օրով, շատ դժվար է լինելու քվորում ապահովել: Շատերը դիտավորություն են տեսնում:
- Հայաստանում 3 միլիոն մարդ կա, ամեն մեկը կարող է ինչ-որ բան տեսնել; Ո՛չ ցանկություն, ոչ էլ հնարավորություն ունեմ ամեն մեկի երևակայությունը կամ տեսնելու ցանկությունը մեկնաբանելու: Ես մեկնաբանում եմ կոնկրետ փաստը: Եվ կրկնում եմ՝ քաղաքական մեծամասնությունը սատարում է Վիգեն Սարգսյանի քաղաքականությունը և սա ոչ միայն Վիգեն Սարգսյանի, այլև քաղաքական մեծամասնության քաղաքականությունն է: Մոռանում եք, որ ամենամեծ ընդդիմադիր խմբակցությունը (Ծառուկյան) առաջին ընթերցմանը կողմ է քվեարկել: Եվ նաև կոալիցիոն Հայ Հեղափոխական Դաշնակցությունը: Ընդամենը մեկ խմբակցություն է ընդդիմադիր, որ դեմ է, դա էլ բազմակարծություն է, ի՞նչ է եղել որ:
-ՊՆ փոխնախարար Արտակ Զաքարյանը հայտարարեց, որ զիջումների են գնալու, և բացառիկ տաղանդավորներին տարկետման հնարավորություն է տրվելու: Իսկ ինչպե՞ս է որոշվելու՝ ով է բացառիկ տաղանդավոր, ո՞վ է չափվելու այդ տաղանդը: Չե՞ք կարծում, որ սա կոռուպցիայի բուն է:
-Կարծում եմ՝ այս մասին առավել մանրամասն խոսելու հնարավորություն կլինի երկրորդ ընթերցման ժամանակ: Երբ հիմնական զեկուցողը կպատասխանի պատգամավորների հարցերին:
-Սահմանադրական դատարանի որոշման մասին խոսենք: Ի վերջո, սա հանգուցալուծում տվե՞ց Վանաձորում ստեղծված վիճակին, որտեղ փոքրամասնությունը «զավթել էր» հանրապետության երրորդ քաղաքի կառավարման լիազորությունները:
-Չի կարող փոքրամասնությունը կառավարել: Եթե Վանաձորում մեր թեկնածուն փակ, գաղտնի քվեարկությամբ հավաքել էր անհրաժեշտ ձայները, անցել էր, եթե այլ թեկնածու փակ գաղտնի քվեարկությամբ հավաքեր, նա կլիներ քաղաքապետ: Առնվազն տասը տարի է՝ իմ գործունեությունը լուսաբանել եք, պետք է շատ լավ իմանաք, որ Սահմանադրական դատարանի որևէ որոշում որևէ անգամ չեմ մեկնաբանել: ՍԴ ցանկացած որոշում`անկախ նրանից, թե ինչից է բխում կամ չի բխում, պարտադիր է յուրաքանչյուր քաղաքացու համար` այդ թվում նաև իմ և բոլորի համար, որովհետև Սահմանադրական դատարանը վերջին ատյանն է: Եվ անդամ ՍԴ վճիռներն անգամ քննարկելը, կարծում եմ, ավելորդ է:
-Իսկ Մամիկոն Ասլանյանը, Ձեր կարծիքով, պետք է հրաժարակա՞ն տա:
-Սահմանադրական դատարանի որոշման մեջ նման բան չեմ տեսել, որ Մամիկոն Ասլանյանը պետք է հրաժարական տա: Ինչի՞ պետք է հրաժարական տա, ընտեղ նման կետ կա՞։
Մանրամասները՝ այստեղ.