Նոր նշանակումներ հայկական բռնցքամարտում

Օլիմպավանում կայացավ բռնցքամարտի 10-րդ համաժողովը: Հայաստանի բոլոր տարիքային հավաքականների մարզիչները, մարզերի պատասխանատուները տարեկան հաշվետվություն ներկայացրին համաժողովին:

Ներկաները քննարկեցին բռնցքամարտում առկա խնդիրները, դրանց լուծման տարբերակները, 2018 թ. ծրագրերը: Ֆեդերացիայի նախագահ Արթուր Գեւորգյանն իր գոհունակությունը հայտնեց ազգային թիմի գլխավոր մարզիչ Դավիթ Թորոսյանին՝ հավաքականի արդյունքների համար.

«Այս տարի պրոֆեսիոնալ ռինգում հաստատվեցին մեր երեք բռնցքամարտիկները: Ընդհանուր առմամբ նրանք անցկացրին 14 մենամարտ, բոլորը հաղթանակով, որից 12-ը ավարտեցին ժամանակից շուտ: Նրանք կշարունակեն մրցել նաեւ սիրողական բռնցքամարտում: Հավաքականի աշխատանքը գնահատում եմ լավ՝ վերջին տարիներին մենք նման արդյունք չենք ունեցել: Կարծում եմ՝ Հովհաննես Բաչկովը դեռ իր խոսքը կասի սիրողական բռնցքամարտում:

Երիտասարդական հավաքականը Եվրոպայի առաջնությունում մեդալներ չունեցավ, սակայն թիմից դժգոհ չեմ, ինչպես նաեւ բավարար եմ գնահատում ավագ պատանիների ու կրտսեր պատանիների թիմերի աշխատանքը»,- ասաց ֆեդերացիայի նախագահը:

Արթուր Գեւորգյանը նշեց, որ 2018 թվականն ազգային հավաքականի համար մեծամասամբ պատրաստական աշխատանքների տարի կլինի: Նրանք կմասնակցեն ընկերական մրցաշարերի, լավագույն մարզավիճակ ձեռք կբերեն, որ 2019 թ. կարողանան պայքարել օլիմպիական խաղերի ուղեգրերի համար: Իսկ հաջորդ տարվա կարեւորագույն մրցումը կլինի Մ 22 տարեկանների Եվրոպայի առաջնությունը:

Ֆեդերացիայի նախագահը հայտնեց, որ տարվա վերջին բոլոր մարզիչները պետք է հանձնեն գործնական քննություն: Մարզչական աշխատանքը կկարողանան շարունակել այն մասնագետները, որոնք հաջող կհանձնեն քննությունը եւ ֆեդերացիայի կողմից համապատասխան որակավորում կստանան.

«Մենք շատ ենք հեռացել հայկական դասական բռնցքամարտից: Ունենում ենք Հայաստանի չեմպիոն, որը գալիս է հավաքական եւ չի տիրապետում տարրական հնարքների: Կարծում եմ՝ մարզիչների քննությունը մեզ կօգնի այս հարցը կարգավորել»:

Ֆեդերացիայի նախագահը նաեւ մարզչական նոր նշանակումներ կատարեց: Ազգային հավաքականը կշարունակի գլխավորել Դավիթ Թորոսյանը, իսկ նրան կօգնի Վահան Ադիլխանյանը: Երիտասարդական հավաքականի ավագ մարզիչ նշանակվեց Կարեն Աղամալյանը, ում օգնականը կլինի Ռիոյի օլիմպիական խաղերի մասնակից Վլադիմիր Մարգարյանը: Ավագ պատանիների թիմն այսուհետ կմարզեն Արտյոմ Սիմոնյանը եւ Ռոբերտ Պետրոսյանը: Կրտսեր պատանիների թիմը կշարունակի աշխատել Աշոտ Ավետիսյանի ղեկավարությամբ: Կանանց հավաքականի գլխավոր մարզիչ նշանակվեց Խաչիկ Խաչատրյանը.

«Այժմ հավաքականներում աշխատելու հնարավորություն տալիս ենք նաեւ երիտասարդներին: Նրանք շատ լավ բռնցքամարտիկներ են եղել, կարծում եմ հաջող կլինի նաեւ մարզչական գործունեությունը»,- ասաց Արթուր Գեւորգյանը:

ՀԲՖ նախագահը տեղեկացրեց, որ հավաքականների մարզիչները չեն կարող ունենալ անձնական նոր սաներ՝ այսպիսով հնարավոր կլինի խուսափել սուբյեկտիվությունից: Սակայն, մարզիչները չեն թողնի այն բռնցքամարտիկներին, որոնց հետ աշխատում են տարիներ շարունակ: