Միջգերատեսչական աշխատանքային խումբը քննարկել է պաշտպանության համակարգում կանանց աշխատանքները
Պաշտպանության նախարարության վարչական համալիրում նոյեմբերի 8-ին անցկացվել է ՄԱԿ-ի Անվտանգության խորհրդի N 1325 բանաձևի «Կանայք, խաղաղություն և անվտանգություն» դրույթների իրականացման հարցերով ստեղծված միջգերատեսչական աշխատանքային խմբի արտագնա հանդիպումը: Ինչպես տեղեկացրին ՀՀ պաշտպանության նախարարության տեղեկատվության և հասարակայնության հետ կապերի վարչությունից, ի թիվս այլ հարցերի` ամփոփվել են նաև ՄԱԿ-ի Բնակչության հիմնադրամի և ՊՆ մարդու իրավունքների և բարեվարքության կենտրոնի միջև համագործակցության 2017թ. ծրագրի շրջանակում կատարված աշխատանքները:
Միջոցառման ընթացքում ներկայացվել են պաշտպանության համակարգում կանանց ներգրավման, նրանց իրավունքների պաշտպանության, հավասար հնարավորությունների ապահովման և ծառայողական առաջխաղացման ուղղությամբ կատարված աշխատանքները: Զեկույցներով հանդես են եկել ՊՆ մարդու իրավունքների և բարեվարքության կենտրոնի պետը, ՄԱԿ-ի Բնակչության հիմնադրամի գործադիր ներկայացուցիչը, ՀՀ ՊՆ խաղաղապահ բրիգադի հրամանատարը, ՊՆ, զինված ուժերի և ԶՈՒ գլխավոր շտաբի ստորաբաժանումների ներկայացուցիչներ, փորձագետներ: