Կարմիր Խաչը խոստովանել է, որ Էբոլայի դեմ պայքարի համար 5 մլն դոլարի նվիրատվությունները կորել են
Արևմտյան Աֆրիկայում Էբոլայի տենդի համաճարակի դեմ պայքարի համար հավաքված հինգ մլն դոլարից ավելի մարդասիրական օգնությունը կորել է խարդախության ու կոռուպցիայի պատճառով: Ըստ BBC-ի ռուսական ծառայության, այս մասին խոստովանել են Կարմիր Խաչի ներկայացուցիչները:
Աուդիտորները հետաքննության ժամանակ հայտնաբերել են բարձր գներով գնումներ, գոյություն չունեցող աշխատակիցներին աշխատավարձերի վճարումներ, ինչպես նաև կեղծ մաքսային հաշիվներ:
Էբոլայի բռնկումը 2014-2016թթ. դարձել է առնվազն 10 հազար մարդու մահվան պատճառ:
Համաճարակի դեմ պայքարի համար կազմակերպվել էր լայնածավալ հումանիտար գործողություն, որի արդյունքում հավաքվել էին միլիոնավոր դոլարներ:
Մինչ Էբոլան տարածվում էր Լիբերիայում, Սիերրա-Լեոնեում և Գվինեայում, Ժնևում Կարմիր Խաչի միջազգային ֆեդերացիան բաշխում էր ֆինանսական նվիրատվությունները այդ երկրներում Կարմիր Խաչի ազգային ընկերությունների միջև՝ ֆինանսավորման ընդհանուր գումարը կազմել է մոտ 100 մլն դոլար:
Կարմիր Խաչի աուդիտորների հետաքննությունը բացահայտել է, որ Լիբերիայում 2,7 մլն դոլարն անհետացել է բարձր գներով մատակարարումների և ֆիկտիվ աշխատողներին վճարումների հետևանքով:
Սիերրա-Լեոնեում մարդասիրական կազմակերպության աշխատակիցներն, ըստ երևույթին, գործարքի մեջ են մտել տեղական բանկերի աշխատակիցների հետ և կարողացել են ստանալ երկու մլն-ից ավելի դոլար այն դեպքում, որ Գվինեայում, որտեղ հետաքննությունը դեռևս շարունակվում է, մոտ մեկ մլն դոլար կորել է կեղծ մաքսային հաշիվների պատճառով:
Կարմիր Խաչի ներկայացուցիչները հայտարարել են BBC-ին, որ խորապես ցավում են միջոցների կորելու առնչությամբ: Կազմակերպությունը հայտարարել է, որ մտադիր է խստացնել ֆինանսական կանոնները և պատասխանության կանչել բոլոր մեղավորներին:
Նվիրատվության գումարների հետ խարդախությունը գիշերային մղձավանջ է ցանկացած բարեգործական կազմակերպության համար, նշում է լրատվամիջոցը: