Ալիևն այս գիշեր երբ վերադառնա Բաքու, մտածելու է այն խոսքերի շուրջ, որոնք լսեց ԻԻՀ հոգևոր առաջնորդի շուրթերից
Ի․ Ալիևն այսօր Հ․ Ռուհանիի հետ խոսեց տարբեր խնդիրներից, երկու երկրների միջև հարաբերությունները զարգացնելու կարևորությունից, Հյուսիս-Հարավ միջանցքից և այլն, և այլն․․․, բայց այս գիշեր երբ վերադառնա Բաքու, մտածելու է այն խոսքերի շուրջ, որոնք այսօր լսեց ԻԻՀ հոգևոր առաջնորդի շուրթերից։
Իսկ հոգևոր առաջնորդի խոսքերը, մեղմ ասած, այնքան էլ չէին բխում եռակողմ հանդիպման տրամաբանությունից։ Ադրբեջանական մամուլն այդ հանդիպման գրեթե չի անդրադարձել և դա ևս տրամաբանական է։
Ալի Խամենեին նախ ասել է, որ Ադրբեջան-Իրան հարաբերություններն ունեն հակառակորդներ, որոնց հրահրումներն ու սադրիչ գործողությունները պետք է կանխարգելել՝ բնականաբար ակնարկելով Իսրայելին։
Ապա շեշտելով այն, որ Ադրբեջանի բնակչության մեծամասնությունն իսլամի շիայական ուղղության հետևորդ է, ինչպես Իրանում և Իրաքում, հիշել է, որ նույնիսկ Խորհրդային Միությունը չի կարողացել Ադրբեջանում արմատախիլ անել կրոնի հիմքերը՝ ակնարկելով, որ Ի․ Ալիևի ջանքերը ևս այդ ուղղությամբ զուր են։
Իրանի հոգևոր առաջնորդը ակնածանքով է խոսել Ադրբեջանում այս տարի տեղի ունեցած սգո կրոնական քայլերթերի բազմամարդության մասին, որոնց կանխարգելման համար, ի դեպ իր կառավարման տարիներին Ի․ Ալիևը հազար ու մի միջոցի է դիմել՝ օրենսդրական փոփոխություններից սկսած մինչև սպանություններ և ձերբակալություններ։
Վերջում Ի․ Ալիևն հիշեցվել է նաև այն մասին, որ Ադրբեջանում կա ինքնության խնդիր և այդ հարցում պետք է հույս դնել կրոնի վրա։
Արտյոմ Տոնոյան. Ֆեյսբուք