Ուսանողները ՊՆ-ի դեմ են դուրս եկել

Armlur.am-ը գրում է. Արդեն մի քանի օր է, ինչ բուհերի ուսանողները բողոքի ակցիա են անցկացնում` ընդդեմ ՀՀ պաշտպանության նախարարության: Պատճառը պաշտպանության նախարարության կողմից ներկայացված տարկետման իրավունքը վերացնող օրենսդրական նախագծին է: 

Երեկ «Տարկետում լինելու է» պաստառներով բողոքող ուսանողները Երևանի պետական համալսարանի մոտ էին հավաքել, որից հետո երթով շարժվեցին դեպի ՀՀ կրթության և գիտության նախարարություն: Նշենք, որ ԵՊՀ և այլ բուհերի ուսանողները բողոքում են «Պաշտպանության մասին» և «Զինվորական ծառայության» մասին օրենքներում պաշտպանության նախարարության առաջարկած փոփոխությունների դեմ:

Իսկ օրենսդրական այս նախաձեռնությունը առաջարկում է տարկետում տրամադրել միայն Հայաստանի բուհերում կրթություն ստացող այն քաղաքացիներին, որոնք ՊՆ-ի հետ կկնքեն քաղաքացիաիրավական պայմանագիր ուսումնառության ընթացքում ռազմական պատրաստություն անցնելու և ուսումն ավարտելուց հետո նախարարության նշած վայրում ու պայմաններով ծառայելու դեպքում: Երեկ ԿԳ նախարարության ներկայացուցիչը, ով իջավ բանակցելու ուսանողների հետ, առաջարկեց այս թեմայի շուրջ առաջիկայում հանդիպել և քննարկում անցկացնել:

Սակայն ի պատասխան ԿԳ ներկայացուցչի հրավերի՝ ուսանողներից մեկն արձագանքեց. «Մեր հիմնական դիրքորոշումը հետևյալն է` ակադեմիական տարկետման վերացումը անթույլատրելի է: Հիմա եթե մենք սա որպես սկզբնական կետ ֆիքսում ենք, որ կրթության և գիտության նախարարությունը ոչ թե հանդես է գալիս որպես պաշտպանության նախարարության փաստաբան և լոբբինգ է անում ՊՆ-ի դրած օրինագիծը, որտեղ կոնկրետ այլ գերատեսչության աշխատողները մտնում են կրթական համակարգի, կոպիտ ասած, բոստան ու այնտեղ վարուցան անում, մենք կարող ենք նստել ու զրուցել: Բայց ակադեմիական տարկետումը այն ձեւով, որ այս պահին գոյություն ունի, պետք է պահպանվի: Այս ամենից հետո կարող ենք փոխանակել մեր տեսակետները, թե ինչպես պետք է վերացնենք կոռուպցիան կրթական համակարգում»:

Մանրամասները՝ այստեղ.