Հայաստանը պատրաստ է ստորագրել ԵՄ համաձայնագիրը. Էդուարդ Շարմազանով
«Ժողովուրդ» օրաթերթը գրում է. «Եվրամիությունն ուրբաթ օրը հրապարակել է Հայաստանի հետ նախաստորագրված «Համապարփակ և ընդլայնված գործընկերության համաձայնագիրը», որի վերջնական ստորագրումը նախատեսվում է գալիք նոյեմբերին Բրյուսելում՝ Արևելյան գործընկերության գագաթնաժողովին: Փաստաթուղթը բաղկացած է ավելի քան 300 էջից և ներառում է Հայաստանի ու Եվրամիության միջև գործընկերությանը վերաբերող բազմաթիվ դրույթներ:
«Ժողովուրդ» օրաթերթի հետ զրույցում ՀՀ ԱԺ փոխխոսնակ Էդուարդ Շարմազանովը նշեց, թե իր տեղեկություններով՝ այս պահին կողմերն իրականացնում են տեխնիկական հարցեր, որից հետո կնախապատրաստվեն ստորագրությանը: Նրա խոսքով՝ այս համաձայնագրի ստորագրումը կնպաստի Հայաստանում մարդու իրավունքների պաշտպանության ու ժողովրդավարության զարգացմանը: «Ժողովուրդ» օրաթերթի զրուցակիցն է ՀՀ ԱԺ փոխնախագահ Էդուարդ Շարմազանովը:
-Պարո՛ն Շարմազանով, օրեր առաջ հրապարակվեց ՀՀ-ԵՄ համաձայնագիրը: Արդյո՞ք սա հենց այն փաստաթուղթն է, որին ձգտում էին հասնել կողմերը:
-Սա այն բանակցված փաստաթուղթն է, որը կարելի էր ակնկալել: Կողմերն ամիսներ, տարիներ շարունակ զբաղված էին այս փաստաթղթի մշակմամբ: Սա համաձայնագիր է, որը հնարավորություն է տալիս զարգացնել քաղաքական երկխոսությունը Եվրոպական Միության և Հայաստանի Հանրապետության միջև, որտեղ առանցքային են ժողովրդավարության, մարդու իրավունքների պաշտպանության, իրավունքի գերակայության խնդիրները, և սրանք հնարավորություն կտան շարունակել նաև տնտեսական, սոցիալական բարեփոխումները, ինչպես նաեւ կարևորվում են ոլորտային բարեփոխումները, ինչը մենք արել ենք տարիներ շարունակ ԵՄ-ի օժանդակությամբ: Իմ ունեցած տվյալներով՝ նախաստորագրումից և հրապարակումից հետո հիմա գնում են տեխնիկական աշխատանքներ՝ տեքստի թարգմանություն, նույնականացում, համապատասխանեցում, իսկ քաղաքական ամենակարևոր գնահատականը հանրապետության նախագահն է տվել, և նա ՄԱԿ-ի գլխավոր ամբիոնից նշել է, որ Հայաստանը պատրաստ է ստորագրել նախաստորագրված համաձայնագիրը. այլ բան չեմ կարող ասել:
-Այս ընթացքում մտահոգություններ էին արտահայտվում, թե որքանով ՀՀ-ԵՄ փաստաթուղթը կհամապատախանի ԵԱՏՄ-ի հանդեպ ստանձնած ՀՀ պարտավորություններին:
-Սրանք երկու տարբեր համաձայնագրեր են: Եվրասիական տնտեսական միությունը տնտեսական համագործակցություն է, այստեղ հիմնականում շեշտը դրված է ոչ թե տնտեսական համագործակցության, այլ քաղաքական բարեփոխումների, ժողովրդավարական արժեքների, մարդու իրավունքների, իրավունքների գերակայության վրա, և, բնականաբար, եթե սա հակասեր, հայկական կողմը չէր ստորագրի: Մենք միջազգային սուբյեկտ ենք, և եթե մեկ փաստաթուղթ հակասում է մյուսին, բնականաբար չես կարող մերժել միջազգային օրենքը: Այստեղ որևէ հակասություն չկա ԵԱՏՄ-ի հետ, և սրանք երկու տարբեր ոլորտային փաստաթղթեր են, երկու տարբեր ոլորտից:
-Տնտեսական բաղադրիչի մասին Դուք էլ նշեցիք: Փաստորեն այստեղ շեշտը դրված է միայն քաղաքական բաղադրիչի վրա՞:
-Այո՛, այստեղ շեշտը դրված է միայն քաղաքական երկխոսության վրա, ժողովրդավարական արժեքների գերակայության, բարեփոխումների շարունակականության վրա, ոլորտային բարեփոխումների վրա: Բնականաբար, մարդու իրավունքների պաշտպանության և իրավունքի գերակայությունը նախևառաջ հակակոռուպցիոն գործընթացներ են պարունակում, և, բնականաբար, ժողովրդավարությունն իր մեջ կոռուպցիա չի ներառում: Այսինքն՝ Հայաստանը լի է վճռականությամբ շարունակել կառուցել եվրոպական մոդելի ժողովրդավար պետություն: Եվրոպական մոդելն ու Եվրամիությունը տարբեր են»:
Մանրամասները` «Ժողովուրդ» թերթի այսօրվա համարում: