Այսօր Ապրիլյան քառօրյայի հերոս Տիգրան Աբգարյանի ծննդյան օրն է
Ջեբրայիլի հատվածում նահատակված Տիգրան Աբգարյանը, ով այսօր կդառնար 21 տարեկան տանկիստ էր: Անակնկալի գալով թշնամու հարձակումից՝ Տիգրանը մղվել է առաջնագիծ, մտել թշնամու 8 տանկերի մեջ, անողոք, անզիջում կռիվ է մղել, իր մի տանկով կարողացել է ոչնչացնել թշնամու 3 տանկ ու նահատակվել է:
Հարևանը չէր կարողանում զսպել հուզմունքը՝ և՛ արտասվում էր, և՛ շատ հպարտ էր, ասում է՝ երանի բոլոր հայորդիները Տիգրան լինեն: «Չեք պատկերացնի, ինչքան հավեսով տղա է, չեմ ուզում նրա մասին անցյալ ժամանակով խոսել, չեմ հավատում, որ նա չկա, նա աչքիս առաջ մեծացած երեխա է:
Նա Ղարաբաղում տանկային բիաթլոնի մրցումներում երկրորդ տեղն էր ընկել, շատ ուժեղ տանկիստ է, ֆիզիկապես շատ ուժեղ: Նրա համար ծառայելը հաճույք էր, մի քանի օրով արձակուրդ եկավ, էնքան գոհ էր, շատ լավ էր զգում իրեն, էնպես հրճվանքով էր պատմում իր ծառայության մասին, որ քիչ մնար մարդ իր տարիքը հաշվի չառներ, ելներ, նորից գնար ծառայության: Շատ ժիր էր, ժպիտը դեմքին, հայրը գնում էր Լենինգրադ արտագնա աշխատանքի, մի կերպ յոլա էին գնում, իրենից մեծ եղբայր ունի, հայրն ու եղբայրն են աշխատում տանը, մի կերպ յոլա են գնում, մայրը չի աշխատում»: