Ներկայիս դիրքը լավագույնն է Մխիթարյանի համար. «Արսենալի» նախկին ֆուտբոլիստ
«Արսենալի» և «Վեստ Հեմի» նախկին ֆուտբոլիստ Նիգել Ուինթերբարնը, ով այժմ բրիտանական հեռուստաընկերությունում փորձագետ է, խոսել է «Մանչեսթեր Յունայթեդի» կիսապաշտպան Հենրիխ Մխիթարյանի մասին: Այս մասին հայտնել է «Sky Sports»-ը:
Ուինթերբարնն ընդգծել է այն փաստը, որ հայ ֆուտբոլիստը դարձել է «ՄՅՈւ»-ի ակումբի առանցքային ֆուտբոլիստներից մեկը, չնայած նախորդ մրցաշրջանի սկիզբը ծանր էր ստացվել.
«Կարծում եմ՝ նա հրաշալի ֆուտբոլիստ է: Մենք Հենրիխին վերջին շրջանում տեսնում ենք մի փոքր այլ խաղային դիրքում՝ ավելի խորքից հանդես գալիս, երբ գործում է կենտրոնական հարձակվողի թիկունքում: Դրա հետ մեկտեղ՝ նա կարողանում է տեղաշարժվել աջ եզր, փոխվել դիրքերով Խուան Մատայի հետ: Այդ դեպքում հենց Խուանն է տեղափոխվում կենտրոն: Կարծում եմ՝ «Մանչեսթեր Յունայթեդն» առջևի գծում այս պահին բավականին բազմազան տարբերակներ ունի: Կարծում եմ՝ Մխիթարյանի լավագույն դիրքը հենց դա է, քանի որ նա ունի բարձր որակներ, լավ է տեղաշարժվում, կարող է շրջանցել մրցակիցների, ինչպես նաև արագ գործել հարձակումների ժամանակ:
Ես շատ լավ գիտեմ՝ այն ֆուտբոլիստները, ովքեր լավ են տեղաշարժվում խաղադաշտում, միշտ կարող են մեծ խնդիրներ ստեղծել մրցակցի պաշտպանների համար»,- նշել է նա: