Ռուսաստանում կատարած հանցանքի համար դատում են Հայաստանում
Հոկտեմբերի 13-ին Տավուշի մարզի առաջին ատյանի դատարանում նշանակված էր անշարժ գույքի կադաստրի Իջևանի տարածքային և Տավուշի մարզային ստորաբաժանումների նախկին պետ Կոլյա Խաչատրյանի որդի` Արթուր Խաչատրյանի դատավարությունը:
Ըստ մեղադրական եզրակացության՝ Ա. Խաչատրյանը 2013թ ապրիլի 28-ին, ժամը 03:00-ի սահմաններում գտնվելով Կիսիլյովսկ քաղաքի Ստուդենչեսկայա 10ա հասցեում տեղակայված «Միրաժ» սրճարանի տիրոջ աշխատասենյակում՝ զինված է եղել որսորդական ողորկափող հրազենով:
Մաքսիմ Դովիդկովը փորձել է զինաթափել Արթուր Խաչատրյանին՝ վերցնելով զենքը: Ա. Խաչատրյանը դիտավորյալ սպանության նպատակով, այն է՝ Մաքսիմ Դովիդկովին մահ պատճառելու դիտավորությամբ, հանկարծակի առաջացած անձնական անբարյացակամ վերաբերմունքի հողի վրա այն պատճառով, որ Մ. Դովիդկովը փորձել է վերցնել նրանից զենքը, գիտակցելով իր գործողությունների հնարավոր հետևանքները, քանի որ տնօրենի աշխատասենյակում Մաքսիմ Դովիդկովի հետ գտնվել են Վիտալի Կորնևը եւ Դարյա Դովիդկովան, որսորդական հրացանից կրակոց է արձակել իր առջև կանգնած Մ. Դովիդկովի վրա:
Սակայն Մ. Դովիդկովը կրակոցի պահին կռացել է, և փամփուշտի մեջ լիցքավորված գնդակը Արթուր Խաչատրյանի կողմից արձակված կրակոցի արդյունքում դիպչել է Վիտալի Կորնևին, որը մահացել է:
Արթուր Խաչատրյանին մեղադրանք է առաջադրվել: Ըստ «Դատալեքս» դատական համակարգի` նա կալանավորված է , գտնվում է «Նուբարաշեն» քրեակատարողական հիմնարկում:
Ա. Խաչատրյանի դատը կայանում է ՀՀ-ում, որովհետև նա ձերբակալվել է ՀՀ-ում, գործում է ԱՊՀ երկրների փոխադարձ իրավական աջակցության մասին Մինսկի կոնվենցիա, որի համաձայն``եթե քաղաքացին կալանավորվել է իր երկրում, այլ երկրում նրա կատարած հանցագործության համար դատավարությունը կարող է ընթանալ իր երկրում: