Արտակարգ դեպք Արմավիրի մարզում. 16-ամյա աղջիկը ոստիկաններին հայտնել է, որ գյուղի եկեղեցու հետնամասում իրեն բռնաբարել են, իսկ բժիշկն էլ օգնություն ցույց տալու փոխարեն համոզել է, որ չբողոքի
SHAMSHYAN.com-ի տեղեկություններով՝ Ոստիկանության Արմավիրի մարզային վարչությունում հետաքննություն է սկսվել Արմավիրի մարզի գյուղերից մեկի 11-րդ դասարանի աշակերտուհու նկատմամբ սեռական բնույթի գործողություններ կատարելու փաստով։
Ոստիկանությունը փնտրում է 16-ամյա աղջկա համագյուղացի՝ 15-ամյա Գ. Ս.-ին, ով կասկածվում է գյուղի եկեղեցու հետնամասում Հ. Մ.-ի նկատմամբ բռնաբարություն կատարելու մեջ։
Աղջիկն իրավապահներին հայտնել է, որ բուժօգնություն ստանալու նպատակով դիմել է Արմավիրի հիվանդանոց, սակայն բժիշկը նրան ոչ միայն օգնություն չի ցուցաբերել, այլ նաև համոզել է, որ կատարվածի մասին ոչ ոքի չբողոքի։
Արմավիրի մարզի ոստիկանները ձեռնարկում են օպերատիվ-հետախուզական միջոցառումներ՝ կասկածյալ Գ. Ս.-ին հայտնաբերելու ուղղությամբ։ Ըստ տեղեկությունների՝ դեպքը ամիսներ առաջ է տեղի ունեցել, սակայն, չգիտես ինչու, աղջիկը կատարվածի մասին նոր է հայտնել իրավապահներին։
Նշանակվել է դատաբժշկական փորձաքննություն։