ԱՄՆ կոնգրեսականը այցելել է Լեռնային Ղարաբաղ
ԱՄՆ Կոնգրեսի հայկական հարցերով համանախագահ, Կալիֆորնիայից ընտրված հանրապետական օրենսդիր Դեյվիդ Վալըդեոն այսօր այցելել է Լեռնային Ղարաբաղ: Այստեղ նա կառավարության պաշտոնյաների և Հայ դատի Վաշինգտոնի գրասենյակի գործադիր տնօրեն Արամ Համբարյանի հետ ծանոթացել է HALO Trust կազմակերպության ականազերծման ծրագրերին, որոնց ֆինանսավորմանը նպաստել է որպես Ներկայացուցիչների պալատի առաջատար անդամ: Այդ մասին հաղորդում է «Azatutyun.am»-ը՝ հղում տալովՀայ դատի Վաշինգտոնի գրասենյակը:
Հաղորդագրությունում նշված է, որ երկու շաբաթ առաջ Վալըդեոն ներկայացրել է Լեռնային Ղարաբաղի տարածքում HALO Trust-ի ականազերծման աշխատանքներին Միացյալ Նահանգների շարունակական աջակցության կոչ անող օրենսդրական լրացում, որը Ներկայացուցիչների պալատն ընդունել է՝ որպես 2018 թվականի արտաքին օգնության հատկացումների մաս:
Հայ դատի գրասենյակը նշում է, որ այս օրերին Հայաստան է ժամանելու ամերիկացի կոնգրեսականների պատվիրակություն՝ սեպտեմբերի 21-ին նշելու երկրի Անկախության տոնը և քննարկելու հայ-ամերիկյան տնտեսական ու քաղաքական համագործակցության ընդլայնման ուղիները: Պատվիրակությունում Դեյվիդ Վալըդեոյից բացի ընդգրկված կլինեն Կոնգրեսի հայկական հարցերով հանձնախմբի մյուս համանախագահներ Ջեքի Սփայերը և Ֆրենկ Փալոնը, ինչպես նաև կոնգրեսականներ Աննա Էշուն, Թալսի Գաբարդը և Ջեյմս Սենսենբրեները: