Եթե շարքային զինվորը կարող է սմետան գողանալ, ապա գեներալներն էլ հանգիստ մնացած ամեն ինչը կգողանան ու ոչ մեկ իրավունք չի ունենա ասել, թե ինչու
Գողության կամ մարդասպանության արդարացնելու ոչ մի տարբերակ ինձ համար ընդունելի չէ, քանի որ ցանկացած իրավիճակից կարելի է դուրս գալ առանց մարդ սպանելու ու գողանալու։ Հին հայկական ասացվածք կա ՝ գյուղ չկա, որ շուն չլինի։ Բայց մենք երևի այս մասին շուտ ենք մոռանում ու որոշ խմբի դասվող մարդկանց ցանկացած անօրեն արարք արդարացնում ենք։
Օրինակ, եթե մի ընդդիմադիր հայացքներ ունեցող երիտասարդ որոշի , որ պետք է իրենց հարևանի տանից գողություն անի ու աղջկան էլ բռնաբարի, ապա հետագայում կհայտնվեն մարդիկ, ովքեր կարդացնեն այդ ամենը։
Մեզ մոտ արտոնյալների խմբին են պատկանում հատկապես ժամկետային զինծառայողները։ Մարդիկ մոռանում են, որ նրանք էլ բոլորիս նման մսից ու արյունից և հատկապես ծառայության ընթացքում պետք է շարքային քաղաքացիներից առավել պարտաճանաչ ու օրինակելի լինեն։ Բայց քանի որ բոլորն էլ մեզ նման մարդ են նրանց մեջ էլ կլինեն լավ ու վատ, ազնիվ ու անազնիվ։
Զինվորը գյուղացու տանից գողություն է կատարել։ Գողացել է սմետան, հեռախոս և էլի մի քանի ուտելու բան։ Մարդկանց մեծ մասը արդարացնում են, մեղադրում են պետությանը, տան տիրոջը ,ով ոստիկանություն է դիմել, թե բա՝ զինվոր էր, ինչ կուզի կանի։ Չնայած զինվորին ոչ թե ձերբակելել են այլ նշանակել են փորձաշրջան, բայց վստահ եմ, որ նման դեպքը արդարացնողների մեծ մասի ոտքը եթե փողոցում տրորես հրապարակային մահապատիժ կպահանջեն, անկախ նրանից զինվոր կլինի, թե քահանա։
Իսկ գյուղացի մարդը ինչի՞ համար չպիտի դիմի ոստիկանություն։ Մեկին պատժելու դեպքում միգուցե մի 5 հոգի դարձի գա ու այլևս չմտածի գողության մասին։ Իսկ անպատիժ մնալու դեպքում վաղը ավելի դաժան արարքների ականատես կլինենք։
Միշտ կարծել եմ, որ ամեն մարդ արժանի այն ամենին ինչ մաղթում է մնացածին։ Եթե գողություն և մարդասպանություն ես արդարացնում ուրեմն մի օր դու էլ դրա բաժին ես դառնալու։ Իսկ եթե շարքային զինվորը կարող է սմետան գողանալ, ապա գեներալներն էլ հանգիստ մնացած ամեն ինչը կգողանան ու ոչ մեկ իրավունք չի ունենա ասել, թե ինչու։
Աշոտ Ասատրյան. Ֆեյսբուք: