Բացվել են բազմաթիվ նոր աշխատատեղեր, բազմաթիվ գործարաններ սկսել են ավելի շատ եկամուտներ ստանալ. Սուրեն Կարայանը կառավարության գործունեության մասին

«Այս 8 ամսվա ցուցանիշով տնտեսական ակտիվության ցուցանիշը կազմում է 6.2 տոկոս, երկրորդ կարևոր ցուցանիշն արդյունաբերության աճն է՝ 12.7 տոկոս, արտահանման աճը՝ 21 տոկոսից ավելի, ինչպես նաև աճ ունենք առևտրաշրջանառության և ծառայությունների մասով»,-այդ մասին Ազգային ժողովում լրագրողների հետ ճեպացրույցում ասաց Տնտեսական զարգացման և ներդրումների նախարար Սուրեն Կարայանը:

Ըստ նախարարի՝ թվերը վկայում են այն մասին, որ տնտեսական զարգացման մոդելը, որն ընտրվեց այս կառավարության կողմից, իրեն արդարացնում է:
Հարցին՝ ինչո՞ւ հասարակությունն իր վրա որևէ կերպ չի զգում այդ փոփոխությունները, նախարարը պատասխանեց, որ ողջ բնակչությունն այդ փոփոխություններն իր վրա կզգա որոշակի ժամանակ անց, երբ տնտեսական աճն ու տեմպերը որոշակի ժամանակահատված պահպանվեն:

«Ներկայումս բնակչության որոշակի մաս իր վրա արդեն իսկ զգացում է այդ փոփոխությունները, որովհետև բացվել են բազմաթիվ նոր աշխատատեղեր, բազմաթիվ գործարաններ սկսել են ավելի շատ եկամուտներ ստանալ, որովհետև արձանագրում ենք, որ կա արդյունաբերության, տնտեսական աճ, ինչը չի կարող չանդրադառնալ բնակչության վրա: Այլ խնդիր է, թե մեր ամբողջ բնակչությունը երբ իր վրա կզգա այդ ամենը, դրա համար պետք է որոշ ժամանակ»,-ասաց նա:

Հարցին՝ հայտարարված 800 մլն ներդրումների միայն 40 տոկոսն է դեռևս իրականացվել և տարվա մեծ մասն անցել է, դա քիչ չէ՞, Սուրեն Կարայանը պատասխանեց.
«Ոչ, քիչ չէ, հիմնականում այդ ներդրումային ծրագրերը, որ մենք հայտարարել ենք, մոտ 830 մլն, բաղկացած է 4 մասից. առաջին մասը պետության հաշվին կատարվող ներդրումային ծրագրերն են, երկրորդ մասը՝ վարկային և դրամաշնորհային միջոցներով կատարվող, երրորդ բաղադրիչը մունիցիպալ մարմինների, և չորրորդը՝ մասնավոր հատվածի կողմից իրականացվող ծրագրերը: Մոտ 40 տոկոսն իրականացվել է այդ ներդրումային ծրագրերի և հույս ունենք, որ մինչև տարեվերջ դրանք ամբողջությամբ կիրականացվեն»,-ասաց նախարարը: