Շարմազանովը Բագրատյանին անգրագիտության մեջ է մեղադրում
Այսօր Հայաստանի Ազգայի ժողովի փոխնախագահ Էդուարդ Շարմազանովը խոսեց նաև Հայ Առաքելական եկեղեցու վերաբերյալ Հայաստանի նախկին վարչապետ Հրանտ Բագրատյանի երեկվա գրության մասին՝ համարելով այն անգրագիտություն։
«Ինչ-որ անհասկանալի բան է կատարվում. Պարոն Բագրատյանը որոշել է օրիգինալ երևալ, պատերազմ է հայտարարում հայոց լեզվին, հետո առաքելական եկեղեցուն, հիմա տեսնենք՝ հաջորդը որն է լինելու», – լրագրողների հետ ճեպազրույցում ասաց Շարմազանովը։
Նա հավելեց, որ ինքը Հայ առաքելական եկեղեցու հետևորդ է և դեպի Հիսուս Քրիստոս տանող ամենաճշմարիտ ճանապարհը Հայ առաքելական եկեղեցին է:
«Եթե ինքը տնտեսությունից խոսեր, ես չէի անդրադառնա, որովհետև ես տնտեսագետ չեմ, բայց նա խոսում է պատմական նյութերից ու աղավաղում է փաստերը: Մարդ կա, քրիստոնյա է, մարդ կա կաթոլիկ է: Ես Հայ առաքելական սուրբ եկեղեցու զավակ եմ ու գտնում եմ, որ դեպի Սուրբ երրորդություն, դեպի Հիսուս Քրիստոս տանող ամենաճիշտ ճանապարհը Հայ առաքելական եկեղեցին է, սա հավատամք է, որը ոչ քաղաքականության, ոչ այլ բանի հետ կապ չունի»,- հայտարարեց նա:
Բագրատյանի այն դիտարկմանը, թե Հայ եկեղեցին կամավոր երկու անգամ կործանել է տվել հայոց պետությունը, Շարմազանովն ասաց, որ 428 թվականին եթե հայ իշխանների հոգևոր ու աշխարհիկ դասի մեջ եղել է մի կառույց, որը դեմ է եղել պետության կործանմանը, որը ամեն ինչ արել է պետությունը պահպանվի և դիմել է իշխաններին, դա եղել է սուրբ Սահակ կաթողիկոսը, իսկ ահա Ավարայրի ճակատամարտում գլխավորել է պայքարը։ 428-ից 652 թվականներին որևէ արտաքին սպառնալիք չունենալով մենք պետություն ենք կորցրել։
Սա կատարյալ անգրագիտություն է։ Արդեն 387 թվականին Հայաստանը բաժանվել է Պարսկաստանի և Հռոմի միջև, իսկ 591 թվականին Պարսկաստանի և Բյուզանդիայի միջև։ Եվ ամենակարևորը՝ ի տարբերություն շատ եկեղեցիների, մեր եկեղեցին և եղել է, հայ ընտանիքի, և հայ հավատքի կրող, և փոխարինել է հայ պետությունը, մեր եկեղեցին եղել է գիտության, մտքի, կրթության օջախ։ Մեզ մոտ զարգացել է գիտությունը։ Ես չեմ հասկանում սրա իմաստը։ Սա կատարյալ անգրագիտություն է։ Եթե նպատակ ունի սեպ խրել պետության և եկեղեցու միջև, չի ստացվի։ Եկեղեցին որևէ կապ չունի մեր պետության կործանման հետ», – հայտարարեց Շարմազանովը։