на Русском
Սուրեն Պապիկյանը հետևել է ԶՈՒ բարձրագույն և ա... 
Տեղի է ունենում ՀՀ ԱԺ արտահերթ նիստ․ Ուղիղ
Ես էլ կարող եմ վարչապետ լինել, բոլորն էլ կարող են. Հակոբ Հակոբյան
Այսօր խորհրդարանում լրագրողների հետ զրույցում ԱԺ ՀՀԿ խմբակցության պատգամավոր Հակոբ Հակոբյանը կարծիք հայտնեց, որ եթե Սերժ Սարգսյանը ցանկանա 2018 թվականին Հայաստանի վարչապետ լինել, ապա կլինի:
Լրագրողների այն դիտարկմանը, թե ՀՀԿ-ականներն արդեն ակնարկում են, որ Կարեն Կարապետյանը վարչապետ չի լինելու, Հակոբյանն ասաց, թե ով նման բան է ասել` իրեն հարցրեք: «Ով որ ակնարկել է… իհարկե, նոր լիազորություններ է ունենալու վարչապետը»,- ասաց պատգամավորը, հավելելով, որ ՀՀԿ-ն` որպես իշխող քաղաքական ուժ, իր որոշումը կկայացնի այն ժամանակ, երբ ավարտվեն Սերժ Սարգսյանի լիազորությունները:
Հարցին, թե Կարեն Կարապետյանը հավակնում է վարչապետի պաշտոնին, նրա կերպարը համապատասխանո՞ւմ է, Հակոբյանն արձագանքեց, թե ինքն էլ կարող է վարչապետ լինել: «Բոլորն էլ կարող են լինել, կուսակցությունը կունենա որոշում: Եթե Սերժ Սարգսյանը ուզենա, անպայման ինքը կլինի, որովհետեւ ինքն է կուսակցության ղեկավարը»,- հայտարարեց Հակոբյանը: Դիտարկմանը, թե այսինքն` միանձնյա որոշո՞ւմ է կայացվելու, պատգամավորը նշեց, թե վարչապետի պաշտոնում ՀՀԿ-ն կառաջադրի երկու կամ ավելի թեկնածուի: Նրա խոսքով` իրենք քվեարկելու են մեկ թեկնածուի, որն առաջարկելու է Սերժ Սարգսյանը:
Իսկ այն դիտարկումը, թե Սերժ Սարգսյանի գործունեությունը շատերի գնահատմամբ ձախողված էր, և, հետևաբար, ի՞նչ իրավունքով է նա շարունակելու ստանձնել երկրի կառավարումը, Հակոբյանի սրտով չէր և նա ի պատասխան այդ դիտարկմանը հայտարարեց, թե շատերն էլ գնահատում են լավ: Ըստ Հակոբյանի` դրա վկայությունն այն է, որ ՀՀԿ-ն ընտրությունների ժամանակ բավականին մեծ թվով ձայներ է ստացել:
