Երբ ավագանին եռամսյա հանգստի է գնում, դա սարսափելի է. Ստյոպա Սաֆարյանը՝ Երևանի ավագանու «կրքերի» մասին

Երևանի ավագանու ընտրություններից հետո ձևավորվեց ավագանու կազմն իր խմբակցություններով, միևնույն ժամանակ խնդիրներով:

Պարզելու համար, թե ինչպիսի՞ն են աշխատանքային խորհրդակցություններն ու փոխհարաբերությունները ավագանու կազմում,  Operativ.am-ի թղթակիցը զրուցեց «Բարև Երևան» դաշինքի անդամ Ստյոպա Սաֆարյանի հետ:

«Այս պահի դրությամբ առայժմ խնդիրներն ենք հավաքագրում, բնակիչների հետ հանդիպումներից հետո, այդ խնդիրների լուծման համար կամ փաստաթղթեր ենք պահանջում, կամ վերահասցեագրում:

Այսօր նման մի բան արել ենք Սունդուկյան 90 հասցեի կանաչապատման տարածքի հետ կապված, երբ պահանջեցինք փաստաթղթեր տրամադրել կասկածելի նախագծից, որը չի հրապարակվում, իսկ բնակիչներին ասում են ապամոնտաժեք ցանկապատերը, թե ի՞նչ են անելու քաղաքային իշխանությունները այդ կանաչապատ տարածքի հետ, որ միայն վերամբարձ խոսքեր էին ճառում կանաչ տարածքների ավելացման հետ կապված, մենք դեռևս չենք կարող գնահատել,-պատասխանեց Սաֆարյանը և հավելեց.- այսօր Տարոն Մարգարյանի մոտ գործավարական խորհրդակցություն էր, որին մենք գրավոր ցանկություն էինք հայտնել մասնակցելու, սակայն մեր ներկայացուցչին թույլ չէին տվել մասնակցել՝ պատճառաբանելով, թե անուն չէինք ներկայացրել՝ կոնկրետ մեզնից ո՞վ է ներկա լինելու, բայց մենք հաջորդ շաբաթներին պարտաճանաչ կմասնակցենք բոլոր գործավարական խորհրդակցություններին»:

Այն հարցին, թե ինչպիսի՞ն են ավագանու կազմում ընդգրկված խմբակցությունների աշխատանքային հարաբերությունները՝ նախկին պատգամավորը պատասխանեց, թե նիստերի ժամանակահատվածից դուրս ավագանու անդամներին գրեթե չի տեսնում.

«Երևի իրենք աշխատելու խնդիր չունեն»,- նշեց խմբակցության անդամը:

«Քաղաքապետի հետ հետագա հարաբերությունների ընթացքը պարզ կլինի, թե որքանո՞վ է օրինական աշխատում քաղաքապետարանի ղեկավարությունը:

Երբ ավագանին եռամսյա հանգստի է գնում, դա սարսափելի է. Երևանը ամենօրյա կառավարում է պահանջում: Չեմ կարծում, որ երևանցիները պիտի երեք ամիս սպասեն, որ ավագանու անդամները արձակուրդից գան ու իրենց խնդիրների մասին տեղեկացնեն: Ավագանին այն մարդն է, ով պետք բնակիչների հետ կապ պահի բակերի, տարածքների և այլ խնդիրների մասին:

Երեք ամիսների ընթացքում քաղաքապետարանի ձեռքերն ազատ է, կարող է անել այն, ինչ ուզում է, կարող է ֆլամինգոներ բերել՝ առանց որևէ քննարկումների, կարող են որոշումներ ընդունվել՝ առանց քննարկումների. գործավարական խորհրդակցություններում  միանձնյա կառավարում է իրականացվում»,- ասաց Սաֆարյանը՝ ավագանու եռամյա արձակուրդի մասին:

Սաֆարյանի խոսքով՝ ընտրություններում արդեն շահել են քաղաքական ուժերը, և թող երևանցին հետևութուն անի, թե իրեն ի՞նչ է պետք:

Այն հարցին, թե  արդյո՞ք քաղաքական մեծամասնությունն  օտար հայացքով չի՞ ընդունում «Ժառանգություն» խմբակցությանը, Սաֆարյանը համաձայնեց.

«Կային այդպիսի հայացքներ, բայց իրավիճակն ինձ համար «դեժավյու» էր. շատ նման էր 2007 թվականին, բայց երբ դու քո տարածքը զբաղեցնում ես ու գործունեությունդ ծավալում, սովորական է դառնում, որ նաև օպոնենտ է հասկանում, որ դու պիտի լինեիր և գործեիր. դա քո տեղն է»:

Զրուցեց Սեդա Ղուկասյանը