Կոտայքի մարզում կինը, մեկնելով արտերկիր, տան բանալիները վստահել է հարևանին, ով, պարզվել է, հմուտ գող է եղել (լուսանկարներ)
Shamshyan.com-ը գրում է.ժողովրդական ասացվածքն ասում է՝ «մոտիկ հարևանը հեռու բարեկամից լավ է»: Որոշ դեպքերում մարդիկ էլ չափից դուրս վստահելով հարևանին՝ նրանց ի պահ են հանձնում իրենց տունը, գույքը և մյուս անշարժ և շարժական գույքը՝ համոզված լինելով, որ հարևանը հոգատար ու սրտացավ վերաբերմունք կցուցաբերի այդ ամենի նկատմամբ: Այդպես է վարվել նաև Կոտայքի մարզի Հրազդան քաղաքի բնակիչ` 64-ամյա Էմմա Մանուկյանը և 1999 թվականին տան բանալիները վստահելով հարևանին՝ մեկնել է արտերկիր: Տունը ապահովված է եղել ամեն ինչով՝ տեխնիկայով, գույքով, կենցաղային և մյուս բոլոր պարագաներով: Եղել են նաև տարբեր տեսակի թանկարժեք ոգելիչ խմիչքներ, անկողնային պարագաներ, շինարարական գործիքներ և այլն:
Մանուկյանը ասաց. «1999 թվականի մարտի 5-ին բանալիները հանձնել եմ կողքի հարևանին, որպեսզի տանը նայի, քանի որ հաճախակի վերևից ջուր էր լցում, իսկ մենք մեկնել ենք Ռուսաստանի Դաշնություն: Դրանից հետո ամեն տարի եկել ենք մինչև 2007 թիվը, ակայն միչև այդ արտառոց ոչինչ չեմ նկատել: 2008-ին և 2009-ին չեմ եկել, իսկ 2010-ին էլ եկել եմ ու տեսել այդ ամենը, որ տունը տակն ու վրա են արել, փչացրել են վերանորոգումը, գույքը կոտրատել են, տեխնիկայի մի մասը տարել են, իսկ մյուս մասը չի աշխատում, գորգերը ճղել են: Մուտքի և ներսի դռներն ամբողջովին կոտրատված էին, փականները չեն աշխատում: Մի խոսքով, մի ահավոր տեսարանի ականատես եղա, որի հեղինակը հենց այդ հարևաններն էին: 2008 թվին անգամ այդ հարևանների համար գումար ենք ուղարկել՝ 6500 ԱՄՆ դոլար, իսկ դրանից բացի, ամեն տարի ծանրոցներ ենք ուղարկել՝ սննդով հագուստով լի, երևի դա էլ մեր լավության դիմաց արեցին: Երբ ես պահանջեցի, որ ինձ պատճառված վնասը փոխհատուցեն, նրանք պատասխանեցին, որ չփորձեմ այդ մասին ձայն հանել, քանի որ իրենք ամուր թիկունք ունեն և մեկ ա, ոչնչի չեմ հասնի:
Սակայն, մեկ է, ես դիմեցի ոստիկանություն, տարբեր տեղեր դիմումներ ներկայացրեցի, սակայն մինչ օրս հարցը ոչ մի լուծում չի ստացել: Այդ մարդիկ ինձ պատճառել են 100.000 ԱՄՆ դոլարի վնաս»: Վերջում հուսահատված կինը փորձեց գոնե այս քայլով խնդիրը բարձրաձայնել և ինչ-որ լուծում ստանալ: