Մինչև մետրոյի նոր կայարաններ չբացվեն, Երևանում տրանսպորտի հարցը չի լուծվելու, իսկ «միասնական օպերատոր»-ն ուղղակի գեղեցիկ բառակապակցություն է. Վահագն Խաչատրյան. Tert.am
Մինչև մետրոյի նոր կայարաններ չբացվեն, Երևանում տրանսպորտի հարցը չի լուծվելու: Իսկ «միասնական օպերատորը», «միասնական տոմսը» ուղղակի գեղեցիկ բառակապակցություններ են, որոնք մարդկանց շփոթության մեջ գցելու համար են: Tert.am-ի հետ զրույցում նման կարծիք հայտնեց Երևանի նախկին քաղաքապետ, տնտեսագետ Վահագն Խաչատրյանը: Ըստ նրա՝ եթե մետրոյի կայարանների խնդիրը դրված չէ, արդեն նախատեսված ծրագիրը կյանքի չի կոչվի. «Շատ ավելի պարզ է լուծումը, քան այս ամեն ինչը ներկայացնում են: Իրականում ոչ ոք չի ուզում Երևանի տրանսպորտի հարցը լրջագույնս լուծել»,- նշեց Վահագն Խաչատրյանը:
- Պարո՛ն Խաչատրյան, երեկ Երևանի փոխքաղաքապետ Վահե Նիկոյանը հայտարարեց, որ տրանսպորտի միասնական համակարգ է ներդրվելու և գծատերեր այլևս չեն լինելու: Սա կարո՞ղ է մայրաքաղաքի տրանսպորտային խնդիրները լուծել:
- Այդպիսի հայտարարություններ առաջին անգամ չենք լսում: Այդպիսի հայտարարություններ եղել է, նոր չէ, բայց, համենայնդեպս, կա քաղաքի տրանսպորտային համակարգի խնդիր: Թե ինչքանով իրականություն կդառնա քաղաքային իշխանությունների այդ հայտարարությունը, դժվար է ասել: Ես շատ մեծ վերապահումներ ունեմ բոլոր հայտարարությունների հետ կապված: Այժմ միայն խոսակցություններ են, եթե այդ փաստաթուղթը հրապարակվի, կծանոթանանք և ավելի կոնկրետ կխոսենք՝ իրականություն կդառնա՞, թե՞ ոչ:
- Նաև հայտարարվեց, որ տրանսպորտի գինը պետք է կախված լինի ուղղությունից, հեռավորությունից, այն, ինչը եվրոպական քաղաքներում է: Սա Երևանի համար աշխատո՞ղ լուծում է:
-Երևանի դեպքում չեմ կարծում, որ դա ինչ-որ բան փոխելու է, որովհետև շատ երկար չեն տրանսպորտի տեղաշարժման հեռավորությունները: Այնպես որ, սա ավելի շատ մոդայի հետևից ընկնել է: Իրականությունից հեռու ինչ-որ որոշումներ են կայացնում: Մեկ ուրիշ ավելի կարևոր խնդիր կա, որի մասին չեն ուզում խոսել: Այն է՝ մինչև մետրոյի նոր կայարաններ չբացվեն, Երևանում տրանսպորտի հարց չի լուծվելու: Մետրոն եթե նույնիսկ չաշխատի խորհրդային միության ժամանակ նախատեսված ծրագրով, գոնե դրա մի քիչ ավելի կրճատված տարբերակով լինի: Բայց մետրոյի զարգացման մասին որևէ խոսք չկա, այս պայմաններում Երևանում տրանսպորտի հարց չի լուծվելու:
- Աջափնյակի և Արաբկիրի կայարանների մասի՞ն է խոսքը:
- Այո, այո: Իրենք դրանից խուսափում են, բայց եթե մետրոն չաշխատեց, Երևան քաղաքում տրանսպորտի հարցերը չեն լուծվելու:
- Եթե տեսականորեն պատկերացնենք, որ նոր կայարաններ են բացվում, որքան է սակագինը կազմելու: Միայն Երևանում է, որ մետրոյի ուղևորատոմսը 100 դրամ արժե, մենք գիտենք դա ինչ արժե Մոսկվայում, եվրոպական քաղաքներում: Նոր մետրոն պետք է եվրոպական գների՞ն մոտ լինի:
- Եվրոպական գների հետ գործ չունենք: Այդ ամեն ինչը հերիք է համեմատենք, որովհետև հակառակ կողմն էլ կա: Եվրոպական ապրելակերպ տվեք ժողովրդին, եվրոպական աշխատավարձ տվեք և դրան համապատասխան մետրոյի գինը 100 դրամից թող դառնա 2 դոլար: Համեմատությունը ավելի շատ դեմագոգիա է, պետք չէ: Երբ ասում են գինը կբարձրանա կամ չի բարձրանա, դա էլ է դեմագոգիա: Սխեման ստեղծեք, ամեն ինչը թող սկսի աշխատել, մարդիկ զգան, որ տրանսպորտից օգտվել է լինում, նոր կարելի է գինը բարձրացնել կամ իջեցնել: Շուկայական տնտեսություն է, հազարավոր լուծումներ կան:
- Ի՞նչ եք կարծում՝ ինչո՞ւ են մայրաքաղաքի իշխանություններն անընդհատ հայտարարում, որ մետրոյի նոր կայարաններ կառուցելու հնարավորություն չունենք:
- Այդ դեպքում թող նույն իշխանությունը վերցնի իր 2009թ.-ի նախընտրական ծրագիրը, որտեղ կար մետրոյի կայրանների շարունակության հարցը: Դա հեռանկար ունեցող իշխանության հայտարարություն էր:
- Քաղաքապետարանի ներկայացուցիչները նշում էին, որ մետրոյի յուրաքանչյուր կայարանի համար 250 մլն եվրո է պետք: Ըստ Ձեզ՝ դա իրակա՞ն հաշվարկ է:
- Ուզում է ասեն 20 մլն, որևէ նշանակություն չունի: Եթե տրանսպորտի հարց եք ուզում լուծել, ուրեմն մետրոյով զբաղվեք, վե՛րջ: Ինչ վերաբերում է հաշվարկներին, ապա դրանք իրականում այդպես չեն:
-Այսինքն, ցանկության դեպքում կարո՞ղ են ներգրավվել միջոցներ մետրոյի նոր կայարանների կառուցման համար:
-Հավատացե՛ք, որևէ խնդիր չկա:
-Նախկինում կասկած կար, որ մետրոյի կայարաններ չեն կառուցվում, քանի որ երթուղային գծատերերի խնդիրը կար, բայց հիմա ասում են՝ հրաժարվում ենք գծատերերից:
- Սպասեք, տեսնենք այդ հայտարարություններն ինչ են լինում: Հազարավոր անգամ այդպիսի հայտարարություններ լսել ենք: Նորից եմ կրկնում, արդեն պարզ է, որ եթե մետրոյից չեն օգտվում, մետրոյի կայարանների խնդիրը դրված չէ, արդեն նշանակում է, որ որևէ ծրագիր իրականություն չի դառնա: