Կառավարությունը քննարկել է պետական հիմնարկներին հանձնված գույքի, վարձակալության տրամադրման կարգին
Այսօր վարչապետ Կարեն Կարապետյանը կառավարության հերթական նիստի ընթացքում անդրադարձավ պետական հիմնարկներին հանձնված գույքի, վարձակալության տրամադրման կարգին։
Նա նշեց, որ իրականացված ուսումնասիրությունների արդյունքում արձանագրվել են մի շարք խնդիրներ․ «Գրանցվել են դեպքեր, երբ գույքի փաստացի նվազագույն արժեքից ակնհայտորեն ավելի նվազ վարձավճարի գին է սահմանվել, կամ երբ վարձակալության հանձնված գույքն ավելի բարձր վարձակալության գնով հանձնվել է ենթավարձակալության: Առկա են նաև խնդիրներ համապատասխան գույքի վերաբերյալ ներկայացված ներդրումային ծրագրերի իրականացման հսկողության մասին։
Իրավիճակը պայմանավորված է 2001 թվականին ընդունված կարգի վերանայման անհրաժեշտությամբ, և կադաստրային արժեքի, շուկայական արժեքի գործնականում առկա անհամաչափություններով, ինչպես նաև ներդրումային ծրագրերի նկատմամբ ոչ լիարժեք հսկողական մեխանիզմների առակայությամբ»։
Կարեն Կարապետյանը հաշվի առնելով նշվածը՝ հանձնարարեց Պետական գույքի կառավարման վարչության պետին և Անշարժ գույքի կադաստրի պետական կոմիտեի նախագահին մեկամսյա ժամկետում քննարկել և կառավարության աշխատակազմ ներկայացնել պետական հիմնարկներին հանձնված գույքի վարձակալության տրամադրման կարգի վերանայման վերաբերյալ առաջարկություններ։