Պալատը հիվանդ կառույց է, և ես էներգիա չեմ ծախսի. Տիգրան Աթանեսյան. Aysor.am

Հայաստանի փաստաբանների պալատի անդամ Տիգրան Աթանեսյանը, որը ՓՊ նախագահի նախկին ընտրություններում ՓՊ նախագահի թեկնածու էր, այս տարի սեպտեմբերին կայանալիք նախագահի ընտրություններում չի առաջադրի իր թեկնածությունը:

«Ես չեմ պատրաստվում առաջադրել իմ թեկնածությունը, որի պատճառները շատ են: Նախ ես տեր եմ վերջին ժամանակահատվածում արված իմ բոլոր հայտարարություններին այն մասին, որ Պալատը հիվանդ կառույց է: Որպես ինստիտուտ, ապագա չունեցող կառույց է և այս դեպքում մասնակցել ու այդ Պալատում ինչ-որ պաշտոն զբաղեցնել, լուրջ չէ», - «Aysor.am»-ի թղթակցի հետ զրույցում ասաց Տիգրան Աթանեսյանը:

Փաստաբանը նաև նկատեց, որ իր կարծիքով փաստաբանների մեծ մասը չի կիսում իր տեսակետը և չի ընտրի իրեն:

«Պետք է ներողություն խնդրեմ, բայց համարում եմ, որ մեր փաստաբանների մեծամասնությունը չի հարգում իր մասնագիտությունը և չի հետաքրքրվում փաստաբանությամբ, առհասարակ, այլ ամեն մեկն իր մի կտոր հացն է գտնում և տուն տանում: Չեմ ուզում իմ էներգիան, իմ ուժը սպառել հերթական անգամ: Երկու անգամ դա արել եմ՝ նախագահի ու խորհրդի ընտրություններում: Եթե փաստաբաններին իմ ծառայությունները պետք չեն, իմ տեսակետը չեն կիսում, ես էլ չեմ փորձի ինձ փաթաթել իրենց վզին: Թող գնան, իրենց միջից ընտրեն այն նախագահին, որից գոհ կլինեն»,- նկատեց Տիգրան Աթանեսյանը:

Նկատենք` Աթանեսյանն այն փաստաբաններից է, որը կարծում էր, որ պետք է Փաստաբանների պալատին այլընտրանքային կառույց ստեղծվի և անվերահսկելի լինի:

Նրա դիտարկմամբ, փաստաբանների միավորումը պետք է կառուցվի կոնֆեդերացիայի սկզբունքով՝ լինեն ինքնուրույն միավորումներ, որոնք կիրականացնեն իրենց ներսում կարգապահական վարույթներ, կհսկեն Վարքագծի կանոնագրքի կատարման վրա և այլն, իսկ Պալատի նախագահը պետք է լինի զուտ ներկայացուցչական պաշտոն, պետք է ստեղծվի խորհրդի փոխարեն Նախագահություն առնվազն 30-40 անդամներից, որոնք տարբեր սկզբունքներով ենթարկվեն ռոտացիայի:

Աթանեսյանի կարծիքով, Պալատի նախագահը պետք է ընտրվի Նախագահության կազմից 6 ամիս կամ 1 տարի ժամկետով, առանց հետագա վերընտրվելու հնարավորության կամ առնվազն 5 տարի հետո:

Կարգապահական վարույթները պետք է հարուցի անկախ կարգապահական հանձնաժողովը, փաստաբանի անհամաձայնության և պահանջի դեպքում, գործը պետք է քննի Փաստաբանական դատարանը, որը կարող է կազմավորվել արբիտրաժային դատարանի սկզբունքով: Առանձին միավորումների դեպքում կարող է սահմանվել կարգապահական վարույթների ներքին առանձին կարգ:

Նա կարծում է, որ փաստաբանների վարքագծի գործող կանոնագիրքը պարզապես ծաղր է իրավաբանության նկատմամբ, այն պետք է լինի կառուցված քրեական օրենսգրքի նման՝ մեղքի հասկացոթյուն, զանցանքի հասկացություն, զանցանքի հստակ նկարագրություն և համապատասխան հետևող տույժերի ցանկ և այլն:

Մանրամասները՝ այստեղ.