Սպանություն և ապօրինի զենք-ռազմամթերք կրելու մեջ մեղադրվողը դատապարտվեց 10 տարվա ազատազրկման
Սպանություն կատարելու, ապօրինի կերպով ձեռք բերված զենք-ռազմամթերք կրելու և առանց իրացնելու նպատակի թմրամիջոցի ապօրինի շրջանառություն կատարելու մեջ մեղադրվող Սասուն Կարապետյանը Գեղարքունիքի մարզի ընդհանուր իրավասության դատարանի կողմից մեղավոր է ճանաչվել և դատապարտվել 10 տարվա ազատազրկման:
Իսկ ամբաստանյալներից Սարգիս Գալստյանը մեղավոր է ճանաչվել ՀՀ քրեական օրենսգրքի 334-րդ հոդվածի 1-ին մասով՝ հանցագործությունը պարտակելը, և դատապարտվել ազատազրկման 2 տարի 2 ամիս ժամկետով:
Ըստ մեղադրանքի, Սասուն Կարապետյանը 2014 թվականի հոկտեմբերի 12-ին ժամը 16.20-ի սահմանում Վարդենիս քաղաքի Վազգեն Սարգսյան փողոցում գտնվող անվադողերի վերանորոգման կետի մոտ, Վարդենիս քաղաքի բնակիչ՝ Արման Մանուկյանի կողմից, իր ընկերոջ Սարգիս Գալստյանի դեմքի շրջանին հարվածելուց և նույն օրը ժամը 16.30-ի սահմաններում Արման Մանուկյանի կողմից իրեն ձեռքով հարվածելուց, ապա փայտով իր «ԲՄՎ» մակնիշի առանց հաշվառման համարանիշի ավտոմեքենային հարվածելուց վիրավորված, նույն օրը ժամը 17-ի սահմաններում, որպես հատուցում Արման Մանուկյանի կողմից իրեն պատճառված անպատվությանը, ապօրինի կրելով իր կողմից ապօրինի ձեռք բերված և պահած հրազեն հանդիսացող «ԱԿ-74» տեսակի ինքնաձիգը` լիցքավորված ռազմամթերք հանդիսացող փամփուշտով, հանդիպել է ընկերոջը՝ Սարգիս Գալստյանին, այնուհետեւ վերջինիս անձնական օգտագործման «Մերսեդես» մակնիշի ավտոմեքենայով, առջեւի աջ նստատեղին նստելով, միասին գնացել են Արման Մանուկյանի բնակության վայր: Այնտեղ ցուցադրաբար ավտոմեքենան կայանել են Գրիշա Մանուկյանի բնակարանից շուրջ 150 մետր հեռավորության վրա, ինչը նկատելով Գրիշա Մանուկյանը, Արման Մանուկյանը և նրանց ընկերները, Գրիշա Մանուկյանի վարած «Նիվա» մակնիշի ավտոմեքենայով մոտեցել ու կանգնել են Սարգիս Գալստյանի ավտոմեքենայի դիմաց:
Սասուն Կարապետյանն ապօրինաբար Արման Մանուկյանին կյանքից զրկելու դիտավորությամբ վերցնելով «ԱԿ-74» տեսակի ինքնաձիգը մեքենայի առջևի աջ նստատեղից իջել և մոտեցել է «Նիվա» մակնիշի ավտոմեքենայի առջևի աջ նստատեղում նստած Արման Մանուկյանին, հայհոյել ու ինքնաձիգի փողն ուղղելով Արման Մանուկյանի կրծքավանդակի ուղղությամբ կրակոց է արձակել և ապօրինաբար Արման Մանուկյանին պատճառել հրազենային, գնդակային, թափանցող միջանցիկ մահացու վնասվածք, ապա ինքնաձիգը ձեռքին արագ մոտեցել է իրեն արդեն իսկ սպասող Սարգիս Գալստյանի ավտոմեքենայի առջևի աջ նստատեղի բաց դռանը, նստել ավտոմեքենայի առջևի աջ նստատեղին և Սարգիս Գալստյանի հետ դիմել է փախուստի` իրենց հետ տանելով ինքնաձիգը:
Իսկ Արման Մանուկյանին եղբայրը` Գրիշա Մանուկյանը տեղափոխել է Վարդենիսի հոսպիտալ, որտեղ Արման Մանուկյանը ժամը 18.05-ին ընդունվել է մահացած վիճակում:
Դրանից բացի, Սասուն Կարապետյանն առանց իրացնելու նպատակի ապօրինի ձեռք է բերել եւ իրենց բնակարանի ննջասենյակի պատուհանագոգին ապօրինի պահել է 0.95 գրամ հաստատուն քաշով «Մարիխուանա» տեսակի թմրամիջոց, որը 2014 թվականի հոկտեմբերի 14-ին ժամը 11-ին կատարված խուզարկության ընթացքում նշված վայրից հայտնաբերվել է ոստիկանության աշխատակիցների կողմից: