«Զինված խմբի» գործով նիստին դատարանը մասնակիորեն բավարարեց ամբաստանյալներից Էդվարդ Ներսիսյանի շահերի պաշտպանի միջնորդությունը
Երևանի Կենտրոն և Նորք Մարաշ վարչական շրջանների ընդհանուր իրավասության դատարանում «Զինված խմբի» գործով նիստին այսօր` հուլիսի 21-ին, դատարանը մասնակիորեն բավարարեց ամբաստանյալներից Էդվարդ Ներսիսյանի (Ապար) շահերի պաշտպան Կարմեն Պողոսյանի միջնորդությունը` դատաբժշկական փորձաքննություն նշանակելու վերաբերյալ:
Ամբաստանյալներից Արթուր Եղիազարյանի շահերի պաշտպան Անժելիկա Հակոբյանն էլ միջնորդություն ներկայացրեց իր պաշտպանյալի խափանման միջոց կալանավորումը փոխելու վերաբերյալ: Մյուս պաշտպանները միացան պաշտպանի միջնորդությանը, իսկ մեղադրող կողմը առարկեց` նշելով, որ միջնորդությունը բավարարելու համար բավարար հիմքեր չկան: Դատավորը վերադառնալով խորհրդակցական սենյակից մերժեց միջնորդությունը:
Ամբաստանյալներից Խաչիկ Ավետիսյանի շահերի պաշտպան Գիվի Հովհաննիսյանը եւս իր պաշտպանյալի խափանման միջո կալանքը փոխելու վերաբերյալ միջնորդություն ներկայացրեց: Պաշտպանը, սակայն, նշեց, որ դատարանը կարող է խորհրդակցական սենյակ չգնալ, քանի որ պարզ է, որ մերժելու է միջնորդությունը: Խաչիկ Ավետիսյանն էլ միացավ պաշտպանի խոսքին եւ ավելացրեց, որ հրաժարվում է միջնորդությունից. «Հրաժարվում եմ միջնորդությունից, մերժելու եք ամեն դեպքում, իսկ մեզ իզուր այդքան հանելու եւ իջեցնելու եք»:
Ըստ մեղադրական եզրակացության՝ Արթուր Վարդանյանը 2015թ. ապրիլից ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել: Այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:
Նրանց բոլորին մեղադրանք է առաջադրվել Քրեական օրենսգրքի 223-րդ հոդվածի (Հանցավոր համագործակցություն ստեղծելը կամ հանցավոր համագործակցությանը մասնակցելը), 235-րդ հոդվածի 3-րդ (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, կատարվել են կազմակերպված խմբի կողմից) և 35-300-րդ հոդվածի 1-ին մասով (Իշխանությունը յուրացնելու նախապատրաստություն): Նշենք, որ դատարան է ուղարկվել այն անձանց գործը, որոնց մեղադրանքը հետագայում խստացվել էր: