Մենք Արտուշ Գաբրիելյանի գերիները չենք. Սասնա ծռերի պաշտպանը հարգալից վերաբերմունք պահանջեց
Armtimes.com-ը գրում է. «Սասնա ծռերի» 18 անդամի գործով այսօր տեղի ունեցած դատական նիստի ընթացքում հերթական սանկցիան կիրառվեց մի խումբ փաստաբանների՝ Մուշեղ Շուշանյանի, Նինա Կարապետյանցի եւ Արայիկ Պապիկյանի, ինչպես նաեւ երկու քաղաքացիների նկատմամբ:
Վերջիններս դատարանի ներս մտնելիս ոտքի չէին կանգնել, նրանք դուրս հրավիրվեցին դահլիճից: Իսկ փաստաբանների նկատմամբ սանկցիա կիրառվեց, որովհետեւ նրանք թույլ չէին տվել իրենց խուզարկել նիստերի դահլիճ մտնելիս եւ ներս չէին մտել:
Փաստաբաններից Գրիշա Բալասանյանը բարձրացրեցին նիստերի դահլիճ ջուր բերելու հնարավորություն տալու հարցը, ինչպես նաեւ առաջարկեցին, որ դատավորն ընդմիջում հայտարարելիս տեղեկացնի, թե որքան ժամանակով է հեռանում: «Դուք պարբերաբար պահանջում եք հարգալից վերաբերմունք դատարանի նկատմամբ: Պահանջում եմ ձեզնից որպես դատարան, հարգալից վերաբերմունք դատավարության բոլոր մասնակիցների նկատմամբ: Երբ հեռանում եք խորհրդակցական սենյակ չեք ասում, թե ինչքան ժամանակով եք գնում, շատ ներողություն, մենք Արտուշ Գաբրիելյանի գերիները չենք: Դուք պարտավոր եք հարգել մեզ, ասել, թե որքան ժամանակով եք գնում, որպեսզի մենք կարողանանք կազմակերպել եւ մեր ընդմիջումը, եւ մեր հանգիստը: Բացի այդ սա էս պահին համարում եմ իմ աշխատավայրը, հետեւաբար պետք է պահպանվի բոլոր պայմանները՝ իմ աշխատանքը կազմակերպելու համար: Մեզ չեն թողնում նույնիսկ ջուր անցկացնել նիստերի դահլիճ»,- դիմելով դատավորին հայտարարեց Բալասանյանը:
Ի պատասխան դատավոր Արտուշ Գաբրիելյանն ասաց, որ «Դուք հիմա առաջարկում եք, որ ես թույլատրեմ ջրի շշեր բերեք, դնեք սեղաններին: Պատկերացնո՞ւմ եք՝ նիստերի դահլիճը կդառնա ընդմիջման վայր՝ բուֆետ»: Դատավորն առաջարկեց, եթե փաստաբանները ջուր խմելու կարիք ունեն, ինքը կարող է թույլատրել այդ նպատակով դուրս գալ նիստերի դահլիճից: Պաշտպանները չհամաձայնեցին: «Դպրոցում չենք, որ ձեռք բարձրացնենք ու թույլտվություն խնդրենք»,- նկատեց փաստաբան Գրիշա Բալասանյանը:
Սույն գործով նիստը հետաձգվեց եւ նշանակվեց հուլիսի 27-ին՝ ժամը 11:00-ին: