Հայաստանի ամենաաղքատ նախարարը. որքա՞ն ունեցվածք ունի Արտեմ Ասատրյանը
Արտեմ Ասատրյանը, ըստ ներկայացրած հայտարարագրի, ամենաաղքատ նախարարներից է: Նա ունի «ընդամենը» 29.5 մլն դրամ և որպես եկամուտ հայտարարագրած ամսական 564 հազար դրամ արժողությամբ աշխատավարձ:
Սա նախարարը հայտարարագրել է անցած տարի: 2011 թվականին Արտեմ Ասատրյանն ունեցել է 3 մլն դրամ, իսկ որպես եկամուտ հայտարարգրել է երկու վայրից ստացած ամսական 372 հազար դրամի չափով աշխատավարձը: 2012 թվականին Ասատրյանի 3 մլն դրամը վերածվել է 30 մլն դրամի:
2013 թվականին նախարարի դրամական միջոցներն ու եկամուտը փոփոխություն չեն կրել: Այսինքն նույն 30 մլն դրամական միջոցը նա ունեցել է նաև 2013-ին: Սակայն 1.5 մլն դրամի ավելացում նկատվել է 2014 թվականին` 30 մլն դրամը դառնալով 31.5 մլն դրամ:
Իսկ 2015 թվականի տարեկան հայտարարագրում նշված է, որ նախարարն ունի 31 միլիոնի չափ դրամական միջոց: Նույն տարում նա որպես եկամուտ հայտարարգրել է ամսական աշխատավարձը` 663 հազար դրամ: Նկատենք, որ սոցապ նախարարը և 2012, և 2014, 2016 և 2017 թվականներին` պաշտոնը ստանձնելիս հայտարարագրել է, որ չունի ոչ ավտոմեքենա, ոչ բնակարան:
Նախարարի տիկինը` Մարինե Պետրոսյանը, 2011 թվականին հայտարարագրել է 1 մլն դրամի չափով դրամական միջոցն ու 74 հազար դրամի չափով աշխատավարձը: 2012 թվականին նա դրամական միջոց չի ունեցել. ընդամենը հայտարարագրել է 81 հազար դրամ ամսական աշխատավարձը: 2013 թվականին Մ. Պետրոսյանն ունեցել է 500 հազար դրամի չափով դրամական միջոց և 110 հազար դրամ ամսական աշխատավարձը:
Իսկ 2014 թվականին տիկինը հայտարարագրել է 1 մլն դրամ, 137 հազար դրամի չափով ամսական աշխատավարձ: Սակայն նախարարի տիկնոջ 1 մլն դրամական միջոցը մեկ տարի անց` 2015 թվականին, վերածվել է 3 մլն դրամի: Նույն տարում նրա աշխատավարձը նույնպես ավելացել է` կազմելով 167 հազար դրամ: Իսկ ահա անցած տարի նախարարի տիկնոջ ունեցած փոխառության չափը կազմել է 3120 դոլար: