Հնարավոր չէ համատեղել ստացիոնար ուսումն ու 2-ամյա զինվորական ծառայությունը. Տիգրան Աթանեսյան
Այսօր՝ հուլիսի 18-ին, լրագրողների հետ հանդիպման ժամանակ փաստաբան Տիգրան Աթանեսյանը նշեց, որ փաստաթղթեր է հավաքում Փաստաբանների պալատի նախագահ Արա Զոհրաբյանի ստացած բարձրագույն կրթության և զինվորական ծառայության վերաբերյալ:
Նրա խոսքով՝ հնարավոր չէ համատեղել ստացիոնար ուսումն ու զինվորական ծառայությունը. «Հնարավոր չէ միևնույն ժամանակ և ստացիոնար սովորել, և2 տարի ծառայել բանակում: Մենք այժմ որոշակի փաստաթղթեր ենք հավաքում դրա վերաբերյալ»:
Արա Զոհրաբյանը մամուլի ասուլիսի ժամանակ այս առնչությամբ նշել էր, որ Աթանեսյանը, կարող է դիմել դատարան կամ իրավապահ մարմիններին. «Սիմոն Բաբայանն ի՞նչ կապ ունի, հայհոյախառը գրառումն ի՞նչ կապ ունի: Եթե որևէ հարց կա Աթանեսյանի մոտ, կարող է դիմել դատարան կամ իրավապահ մարմիններին: Ի՞նչ կապ ունի դա Տիգրան Աթանեսյանի կողմից հայհոյախառն մեկնաբանություն գրելու հետ»:
Նշենք, որ Տիգրան Աթանեսյանի գրասենյակում ապրիլի 27-ին տեղի ունեցած պատահարը հաճախ կապում են նրա հետ, որ Աթանեսյանը բարձրացրել էր ՓՊ նախագահի դիպլոմի անվավերության հարցը:
Մասնավորապես, Տիգրան Աթանեսյանը պարզել էր, որ Արա Զոհրապյանը զինված ուժերում ծառայել է «Գլաձոր» համալսարանի ստացիոնար համակարգում սովորելու տարիներին: