на Русском
Հենրի Քավիլն առաջին անգամ հայր կդառնա
Ոստիկանությունը տեսանյութ է ներկայացրել Արթիկ... 
Արցախի ժողովուրդն ունի ոչ պակաս իրավունք տնօրինելու սեփական ճակատագիրը, քան Շոտլանդիայի ժողովուրդը. Արմեն Աշոտյան
ՀՀ Ազգային ժողովի արտաքին հարաբերությունների մշտական հանձնաժողովի նախագահ Արմեն Աշոտյանը հունիսի 27-ին ընդունել է Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Ֆարնուորթին: Այս մասին տեղեկացրին ՀՀ ԱԺ հանրային կապերի վարչությունից։
Ողջունելով հյուրին Ազգային ժողովում՝ Արմեն Աշոտյանը հույս է հայտնել, որ արտաքին հարաբերությունների մշտական հանձնաժողովի նախագահի պաշտոնում դեսպանի հետ իր առաջին հանդիպումը դրական խթան կհանդիսանա խորհրդարանական դիվանագիտության զարգացման գործում:
Արմեն Աշոտյանը բարձր է գնահատել երկու երկրների միջև խորհրդարանական համագործակցության արդյունավետության բարձրացման համար առկա հնարավորությունները և հույս հայտնել, որ այն առաջիկայում կլինի առավել սերտ և նպատակային: Այս համատեքստում կարևորվել է նաև երկու երկրների խորհրդարանների միջև միջխորհրդարանական հարթակներում կառուցողական համագործակցությունը:
Իր հերթին դեսպան Ֆարնուորթը շնորհավորել է Արմեն Աշոտյանին հանձնաժողովի նախագահի պաշտոնում ընտրվելու կապակցությամբ և խորհրդարանական դիվանագիտության շրջանակում առավել արդյունավետ համագործակցության պատրաստակամություն հայտնել:
Անդրադառնալով խորհրդարանական դիվանագիտության արդյունավետությանը՝ կողմերը կարևորել են միջխորհրդարանական բարեկամության խմբերի փոխգործակցության ակտիվացումը: Ընդգծվել են նաև Մեծ Բրիտանիայի դեսպանության հետ համագործակցության հնարավորությունները՝ ուղղված խորհրդարանի կարողությունների կատարելագործմանը:
Հանդիպման ընթացքում կողմերը նաև անդրադարձել են եվրոպական առավել ընդարձակ ընտանիքի շրջանակում երկկողմ համագործակցության հնարավորություններին: Այս համատեքստում Արմեն Աշոտյանն անդրադարձել է Բրեքսիթի գործընթացին և նշել, որ ցանկացած պարագայում Հայաստանը Մեծ Բրիտանիան դիտարկում է որպես եվրոպական արժեհամակարգի կրող երկիր և պատրաստ է հետագա երկկողմ ակտիվ համագործակցության: Այս համատեքստում անդրադարձ է կատարվել նաև Արևելյան գործընկերության շրջանակում համագործակցությանը: Կարևորվել է Բրյուսելի գագաթաժողովում Համապարփակ և ընդլայնված նոր համաձայնագրի ստորագրումը:
Կողմերն անդրադարձել են նաև տարածաշրջանային համագործակցության հիմնախնդիրներին: Կարևորվել է տարածաշրջանային կայունության և անվտանգության ապահովումը, առկա հակամարտությունների խաղաղ կարգավորումը:
Անդրադառնալով Լեռնային Ղարաբաղի հակամարտության կարգավորմանը՝ Արմեն Աշոտյանը նշել է, որ Արցախի ժողովուրդն ունի ոչ պակաս իրավունք տնօրինելու սեփական ճակատագիրը, քան Շոտլանդիայի ժողովուրդը: Այս համատեքստում Արմեն Աշոտյանը բարձր է գնահատել Մեծ Բրիտանիայի կառավարության վերաբերմունքը կապված Շոտլանդիայի հանրաքվեի հետ և հույս հայտնել, որ ինքնորոշման իրավունքի լայն կիրառելիության միտումը վաղ թե ուշ ընկալելի կդառնա նաև Ադրբեջանի համար:
Հանդիպման ավարտին կողմերն անդրադարձել են նաև հետագա համագործակցությանը և անելիքներին:
