Արայիկ Խանդոյանին պատժախուց են տեղափոխել լռեցնելու, հոգեբանորեն ճնշելու համար.News.am
News.am-ը գրում է.«Սասնա ծռեր» խմբի անդամ Արայիկ Խանդոյանին՝ «Միայնակ գայլ», պատժախուց են տեղափոխել լռեցնելու, հոգեբանորեն ճնշելու համար: Այս մասին այսօր՝ հունիսի 23-ին, ասաց նրա շահերի պաշտպան Արայիկ Պապիկյանը:
Նա նշեց, որ Արայիկ Խանդոյանի մոտից արգելված իրը հայտնաբերվել է հունիսի 21-ի առավոտյան, որից հետո իր պաշտպանյալը մասնակցել է դատական նիստին, այնուհետեւ առողջական վատ վիճակով՝ հոգնած, սոված եւ բարձր ճնշումով, տեղափոխվել պատժախուց:
«Ես հիմա չեմ ցանկանում բարձրաձայնել, թե ինչ արգելված իրի մասին է խոսքը, բայց ըստ իս, դա արգելված իր չէ: Եթե ՔԿ վարչությունը կամ ՔԿՀ-ն կարձագանքեն կամ կհայտնեն արգելված իրի մասին, մենք կհայտնենք մեր կարծիքը, դիրքորոշումը: Բայց հաշվի առնելով, որ նրա մոտից, այսպես կոչված, արգելված իրը գտել են դատական նիստից առաջ, ապա ակնհայտ է, որ ցանկացել են որեւէ կերպ ճնշում բանեցնել նրա վրա։ Նիստից առաջ են հայտնաբերել եւ այդ պահին պատժախցի մասին ոչինչ չեն ասել»,-ասաց Արայիկ Պապիկյանը:
Նշենք, որ Արայիկ Խանդոյանին մեղադրանք է առաջադրվել ՀՀ ՔՕ 235-րդ հոդվածի 3-րդ մասով (Կազմակերպված խմբի կողմից զենք-զինամթերք ձեռք բերելը, կրելը), 218-րդ հոդվածի 3-րդ մասի 1-ին կետով (կազմակերպված խմբի կողմից պատանդ վերցնելը), 238-րդ հոդվածի 4-րդ մասի 1-ին եւ 2-րդ կետերով: