Բրիտանացին շրջազգեստով է գնացել աշխատանքի այն բանից հետո, երբ նրան արգելել են շորտ կրել (լուսանկարներ)
Եվրոպական շատ երկրներում այժմ անտանելի շոգ է: Այս առնչությամբ շատ գործատուներ երբեմն աչք են փակում խիստ հանդերձանքի վրա և իրենց աշխատակիցներին թույլատրում ավելի ազատ հագուստով գալ աշխատանքի: Այս մասին հայտնում է «Woman.ru»-ն:
Սակայն օրերս զավեշտալի դեպք տեղի ունեցավ Մեծ Բրիտանիայում: Ջոուի Բարջ անունով երիտասարդը աշխատավայր էր եկել մուգ շորտով, բայց իրեն տուն էին ուղարկել փոխելու այն: Այդ ժամանակ նա զավեշտալի լուծում գտավ խնդրին:
20-ամյա բրիտանացին թվիթերյան իր էջում դժգոհեց իր տնօրենի արգելքից և այն բանից, որ իրենց գրասենյակում կանայք հագնվում են այնպես ինչպես ուզում են, ինչից հետո հագավ իր մայրիկիր սև և վարդագույն զգեստն ու վերադարձավ աշխատանքի:
Այս դեպքից հետո տնօրենը էլեկտրոնային նամակով հաղորդագրություն տարածեց, որով թույլատրեց տղամարդկանց աշխատավայրում մուգ շորտեր կրել: Բարջն իր քայլը համարում է համարձակ և փոքրիկ հաղթանակ: