Ալիևը խոստովանում է, որ իր վրա ճնշումներ են գործադրում ճանաչել Արցախը. քաղաքագետ
Այսօր՝ հունիսի 20-ին, լրագրողների հետ հանդիպման ժամանակ, քաղաքագետ Հրանտ Մելիք-Շահնազարյանը, խոսելով արցախա-ադրբեջանական սահմանային լարվածության մասին, նշեց՝ գաղտնիք չէ, որ սահմանային լարվածության գլխավոր պատճառը Ադրբեջանի ունեցած թշնամական դիրքորոշումն է հայ ժողովրդի հանդեպ:
«Իրենց ունեցած թշնամանքը դրսևորելու առիթներ իհարկե շատ են լինում: Կարելի է անգամ մի քանի տասնյակ առիթներ նշել, թե երբ և ինչն է առիթ դառնում, որպեսզի Ադրբեջանը սահմանում կրկին լարի իրավիճակը, բայց արդեն ժամանակն է եկել այս առիթները քննարկելու դիսկուրսը դադարեցնել և հասկանալ, թե իրականում ինչ խնդիրներ են փորձում լուծել Ադրբեջանում նման հարձակումներով, և ինչ թիրախներ է փորձում խոցել սահմանում իրավիճակ սրելով»,- նշեց բանախոսը, հավելելով՝ «Ես եկել եմ այն համոզմունքին, որ Ադրբեջանը ունի հստակ ընտրված թիրախներ՝ քաղաքական, տնտեսական, սոցիալական, հասարակական տրամադրությունների վրա ազդելու թիրախներ, և տարբեր առիթներ է օգտագործում հենց այդ թիրախները խոցելու համար»:
Ըստ բանախոսի՝ Ադրբեջանը մի կողմից հետևողականորեն իրականացնում է Հայաստանը շրջափակելու քաղաքականություն՝ տնտեսական, կոմունիկացիոն առումներով, երկաթգծեր է կառուցում, գազամուղ և այլն:
«Իրանում վարձակալության է վերցրել որոշ տարածքներ: Ադրբեջանը այսպիսով փորձում է Իրանի պոտենցիալը օգտագործելով իր երկրի տարածքով բեռնափոխադրումներ իրականացնելու համար և նման ծրագրերով նա հետևողականորեն ամեն ինչ անում է, որպեսզի Հայաստանը դուրս մնա տարածաշրջանային բոլոր կոմունիկացիոն ծրագրերից»,- ասաց Մելիք-Շահնազարյանը:
Սա, ըստ քաղաքագետի, այն բազմաթիվ թիրախներից մեկն է, որը Ադրբեջանը հետևողականորեն մշակում և իրականացնում է:
«Սահմանում իրավիճակը լարելով՝ Ադրբեջանը միշտ չէ, որ փորձում է զուտ ռազմական տեսանկյունից վնաս պատճառել հայկական կողմին, և իրենց հաշվարկները երբեք ուղղված չեն այն մտքին, որ կրակելով, օրինակ՝ 3 կամ 4 հայ զինվոր սպանելով, իրենք կկորցնեն օրինակ 10 զինվոր, և դա կհամարեն պարտություն: Ամենևին այդպես չէ, և Ադրբեջանում հստակ հասկանում են, որ սահմանային իրադարձությունները ազդում են այլ ոլորտների վրա և նաև հասարակական տրամադրությունների վրա»,- նշեց բանախոսը և հավելեց, որ նման լարվածություններ ստեղծելով որոշակի խնդիրներ են լուծում Ադրբեջանում:
Բանախոսի կարծիքով կորցնելով 10 զինվոր, սպանում են 3 հայ զինվորի, բայց դրա հետ միաժամանակ շահում են Հայաստանում հասարակական դժգոհություններ, ինչը որոշ չափով նաև անվստահության մթնոլորտ է ստեղծում Հայաստանի ներսում՝ բանակի և պետության դեմ:
«Հայկական կողմի արձագանքները և քայլերը չպետք է լինեն արտաքին, ակնառու երևացող այդ փաստերին հակակշռելու տրամադրության վրա, այլ պետք է հասկանանք, որ ավելի կարևոր խնդիրներ էլ կան, և ավելի լուրջ աշխատանք էլ ունենք անելու Ադրբեջանի այդ ագրեսիվ քաղաքականությունը կասեցնելու համար»,- կարծիք հայտնեց քաղաքագետը:
Լրագրողների այն հարցին, թե արդյո՞ք պետք է սպասել լայնամասշտաբ ռազմական գործողությունների, բանախոսը նշեց, որ Ադրբեջանում հասկանում են, որ լայնածավալ պատերազմ սկսելու և առավել ևս հաջողության հասնելու որևէ ռեսուրս չունեն և նաև չունեն վստահություն, որ կարող են դրական ընթացք ապահովել այդ պատերազմի համար:
Խոսելով Ադրբեջանի ներսում տիրող ներքաղաքական և տնտեսական խնդիրներից՝ Հրանտ Մելիք-Շահնազարյանը նշեց. «Ալիևը խոստովանում է, որ իր վրա ճնշումներ են գործադրում ճանաչել Արցախը: Այսինքն նրանց երկրի ներսում առկա խնդիրները ևս կարելի է կապել սահմանային լարվածության հետ»:
«Ադրբեջանում ուզում են պատերազմ սկսել, բայց չունեն ռեսուրսներ: Այսինքն ցանկությունների և ռեսուրսների անհամապատասխանության խնդիր կա: Ես այս պահին չեմ տեսնում լայնածավալ պատերազմ սկսելու վտանգ, չբացառելով՝ դրանով հանդերձ լոկալ ավելի լուրջ բախումներ, քան վերջին օրերին տեղի ունեցածները, որոնց ականատես եղանք, ինչու չէ նաև մոտավորապես այն ինչ տեսել ենք ապրիլին»,- իր խոսքը եզրափակեց բանախոսը: