Իմ շնորհիվ է, որ Սամվել Ալեքսանյանին այդքան մարդ ձայն է տվել. Կորյուն Նահապետյան

«Հրապարակ» օրաթերթը զրուցել է Կորյուն Նահապետյանի հետ, ներկայացնում ենք հատված հարցազրույցից:

ԱԺ գործարար պատգամավոր Սամվել Ալեքսանյանի փեսա Կորյուն Նահապետյանը, որը ՀՀԿ ռեյտինգային ցուցակով առա­ջադրվել էր Մալաթիա-Սեբաստիա և Շենգավիթ վարչական շրջաններն ընդգրկող ընտրատարածքներում, հավաքել է ընդամենը 1000 ձայն, բայց, քանի որ նույն ընտրատարած­քում ՀՀԿ թեկնածուները միասին 60 հազարից ավելի ձայն են ապահովել կուսակցության համար, ապա ընտրա­տարածքից երեք պատգամավոր է գործուղվել խորհրդարան: Ամենաշատ ձայն ստացել է Սամվել Ալեքսանյանը՝ 42 հազարից ավելի: Կորյուն Նահա­պետյանը, կարելի է ասել, մանդատի համար պարտական է իր բարեկամ Ալեքսանյանին: Այս և այլ հարցերի մասին զրուցեցինք ԱԺ պաշտպանու­թյան, անվտանգության և ներքին գոր­ծերի մշտական հանձնաժողովի նա­խագահ Կորյուն Նահապետյանի հետ:

- Ինչպե՞ս եք գնահատում ռեյտինգային ընտրակարգը, Դուք խորհր­դարանի, այսպես ասած, ամենաաշխատող պատգամավորներից եք, սակայն ընդամենը 1000 ձայն ստա­ցաք:

- Ընտրություն է կատարվել, ժողո­վուրդը տվել է իր ձայնը: Տարածքա­յին ցուցակում առաջադրված բոլոր թեկնածուներն ստացել են կոնկրետ ձայներ, բնականաբար, ընտրական նոր համակարգի պայմաններում ըստ իրենց ստացված ձայների որոշվել է, թե ովքեր պետք է ԱԺ-ում շարունակեն իրենց աշխատանքները:

- Կանխատեսո՞ւմ էիք, որ Դուք ընդամենը 1000 ձայն կհավաքեք, մինչդեռ Սամվել Ալեքսանյանը՝ 40 հազարից ավելի: Ի՞նչ չափանիշներով է, ըստ Ձեզ, առաջնորդվել ընտրողը:

-Ամեն մեկն իր ընտրությունը կա­տարելիս ունեցել է իր մոտեցումները, ընտրության իր չափանիշները:

-Իսկ Ձեզ չզարմացրե՞ց, որ ընտրողը Ձեր նկատմամբ այդքան ժլատ գտնվեց, մինչդեռ ոչինչ չա­նող Սամվել Ալեքսանյանի օգտին այդքան ձայն տվեց:

-Դուք նկատի ունեցեք մի բան, որ այս ընտրակարգն ունի իր առանձնա­հատկությունը, որն ընդհանուր եզր չունի նախորդ ընտրակարգի հետ: Երբ որ կա «տարածքային ցուցակ» հասկացողությունը, և տարածքային ցուցակում ընդգրկված են որոշակի թվով թեկնածուներ, բնականաբար, քաղաքացիներն իրենց ընտրության ժամանակ իրենք են որոշում, թե որ թեկնածուի օգտին իրենց ձայնը տան: Հիմա ես ստացել եմ այնքան ձայն, ինչքան որ ինձ տրվել է ընտրողի կող­մից: Բնականաբար, մեր տարածքա­յին ցուցակն ունեցել է անհրաժեշտ ձայների այն քանակը, որ երեք պատգամավոր է անցել խորհրդարան:

-Արդյո՞ք ընդհանուր ցուցակին են ձայն տվել, չե՞ք կարծում, որ եթե Ալեքսանյանը չհայտնվեր նույն ցուցակում, որտեղ Դուք էիք, և ընտրություններում գործի չդներ իր ռեսուրսները, Դուք չէիք հայտնվի խորհրդարանում:

-Ես Ձեզ կարող եմ վստահեցնել մեկ այլ բան, որ իմ գործընկերների ստացած այդ բարձր ցուցանիշի թվաքանակի հարցում չեմ ուզում բացա­ռել նաև իմ դերակատարությունը:

-Այսինքն՝ Ձեր շնորհի՞վ է, որ Ալեքսանյանին այդքան մարդ ձայն է տվել:

-Այո, ինչո՞ւ ոչ:

Մանրամասներոը՝ «Հրապարակ» թերթի այսօրվա համարում: