Պատերազմի ավարտի 2 տարբերակ կա. կա՛մ Բաքուն, կա՛մ Երևանը պետք է գրավվի. Վովա Վարդանով
Այսօր՝ հունիսի 5-ին, լրագրողների հետ հանդիպման ժամանակ ազատամարտիկ, հետախույզ, ռազմական փարձագետ Վովա Վարդանովը խոսելով արցախա-ադրբեջանական սահմանում պատերազմի հնարավոր վերսկսման մասին, նշեց, որ մենք այժմ էլ պատերազմի մեջ ենք. «Չի կարող վերսկսվել այն, ինչ դեռ չի ավարտվել»:
«Operativ.am»-ի այն հարցին՝ պատերա՞զմ եք ուզում, Վարդանովը հարցով պատասխանեց՝ իսկ հիմա պատերա՞զմ չէ. «Դրա անունը տվեք էլի, պատերազմի ինչ-որ փուլ է՝ թեժացումներով, սառեցումներով»:
Այն հարցին, թե ինչպիսի վերջնական լուծում եք տեսնում այս հարցին, բանախոսը ասաց.
«Բաքու կամ Երևան, այս երկու քաղաքներից մեկը պետք է գրավվի»,- և հավելեց, որ ինտենսիվ պատրաստվելու դեպքում երկու-երեք տարին լիովին բավական է, որ կարողանանք մտնել Բաքու:
Նրա խոսքով, իշխանությունները վերջապես ձեռքները տարան գրպանները ու հիմա սահմանին անհրաժեշտ սարքերը կան՝ տեսնելու հակառակորդի տեղաշարժը. «Հիմա արդեն անհնար է դառնում աննկատ մոտենալը դիրքապահներին: Նմանատիպ փորձեր մի քանի անգամ իրականացվել է: Ադրբեջանը գարնանն էլ էր պլանավորել հարձակում իրականացնել, սակայն դա էլ չեղավ, շնորհիվ այդ սարքավորումների»:
Ըստ Վարդանովի պատերազմական լայնամաշտաբ գործողությունների վերսկսման հետ կապված ոչինչ հնարավոր չէ գուշակել. «Ակտիվ կողմը թշնամին է, նա է որոշում լինի պատերազմ թե ոչ, մենք հարձակվողական ցանկացած գործողությունից ձերբազատված ենք»: