Վոլոդյա Ավետիսյանն ազատ է արձակվել

Այսօր՝ մայիսի 25-ին,  «Վարդաշեն» ՔԿՀ-ից ազատ է արձակվել 6 տարի 6 ամիս ժամկետով ազատազրկման դատապարտված պահեստազորի գնդապետ Վոլոդյա Ավետիսյանը:

Վ. Ավետիսյանը ձերբակալվել էր խարդախության համար: Նա, հանդիսանալով պահեստազորի գնդապետ, 2000 դոլար կաշառք է վերցրել Հենրիկ Զաքարյանից՝ նրա թոռանը ժամկետային ծառայությունից ազատելու համար, և 500 դոլար պահանջել է Ալբերտ Մաթոսյանից՝ վերջինիս որդուն զորամասում համակարգչային օպերատոր նշանակելու համար։ 

Պահեստազորի գնդապետին մեղադրանք էր առաջադրվել երկու հոդվածներով՝ ՀՀ քրեական օրենսգրքի 34-178-րդ հոդվածի 2-րդ մասի 5-րդ կետով և 178-րդ հոդվածի 2-րդ մասի 2-րդ և 5-րդ կետերով:

Վոլոդյա Ավետիսյանը, սակայն, չէր ընդունել մեղադրանքը:

Նշենք, որ արցախյան ազատամարտիկ Վոլոդյա Ավետիսյանն ունի 6 զավակ, որոնցից 3-ն անչափահաս են, ընտանիքը ծանր սոցիալական պայմաններում է ապրում: