Եվրասիական միությունը գործնականում մեզ ոչինչ չտվեց. Էդմոն Մարուքյան
Այսօր` մայիսի 20-ին, ԱԺ նիստի ժամանակ «Ելք» խմբակցության պատգամավոր Էդմոն Մարուքյան խոսելով Եվրասիական միությանը անդամագրվելու մասին փաստեց, որ այն ինչ ակնկալում էինք չստացանք:
«Այն պահին, երբ մենք հարժարվեցինք ԵՄ-ի հետ համաձայնագիրը ստորագրելուց, մենք դրանով հրաժարվեցինք ինտեգրվելուց Եվրոպական տնտեսական գոտում, որտեղ ասոցացման համաձայնագիրը մեզ հնարավորություն էր տալիս 500 մլն եվրո ունեցող շուկային ինտեգրվել, որից հետո մենք այստեղ հիմա հպարտանում ենք 180 մլնանոց եվրասիական շուկայով»,- ասաց Մարուքյանը:
Նրա խոսքով տարիները անցել են, բայց առաջընթացը դեռևս տեսանելի չէ:
«Խոսվեց, որ մենք դա արեցինք ելնելով անվտանգությունից, սակայն ապրիլյան պատերազմը եկավ ու ապացուցեց, որ անվտանգության առումով որևէ բան մենք չստացանք: Ավելին` ՌԴ-ն մեր անդամագրվելուց հետո ավելի շատ զենք է վաճառել Ադրբեջանին, քան մինչ այդ: Երևի դա էլ է Եվրասիական միության փաթեթի մեջ մտնում, որ միության գործընկեր պետության թշնամի պետությանը պետք է շատ զենք վաճառել»,- նշեց պատգամավորը:
Ըստ Մարուքյանի շատ կարևոր է արձանագրել, որ Հայաստանը ունեցել է այլընտրանք, սակայն հրաժարվել է այդ այլընտրանքից և եթե հրաժարվել է ելնելով անվտանգությունից, ապա արձանագրվել է, որ դա սխալ է:
«Այսինքն ստացվում է, որ անվտանգության համար մտել ենք չունենք անվտանգություն, տնտեսությունը զարգանալու համար մտել ենք, բայց տնտեսությունը չի զարգանում»,- իր ելույթը եզրափակեց Մարուքյանը: