Հայաստանի կառավարության խայտառակությունը. ՄԻԵԴ-ի վճռով ՀՀ-ն 3600 եվրո կվճարի
Մարդու իրավունքների եվրոպական դատարանն այսօր հրապարակել է «Նիկողոսյանն ընդդեմ Հայաստանի» գործով վճիռը, որով Հայաստանին պարտավորեցրել է 3600 եվրո վճարել՝ որպես ոչ նյութական վնասի փոխհատուցում:
Վճռում նշվում է, որ ՀՀ-ի դեմ բողոքը ներկայացրել է նախկին ՊԵԿ աշխատակից Ռոբերտ Նիկողոսյանը 2011 թվականի դեկտեմբերի 3-ին Մարդու իրավունքների և հիմնարար ազատությունների պաշտպանության մասին կոնվենցիայի 34-րդ հոդվածի հիման վրա:
«Operativ.am»-ի թղթակցի հետ զրույցում հայցվոր Նիկողոսյանը դեպքը որակեց որպես «Հայաստանի կառավարության խայտառակություն»:
«Եվրոպական դատարանն ընդունեց ,որ այս գործում մարդու իրավունքները խախտվել են: Սա Հայաստանի կառավարության խայտառակությունն է: Եվ հիմա այս վճիռը կարդալու են Եվրոպայի 4 տասնյակից ավել երկրներում»,- ասաց նախկին ՊԵԿ աշխատակիցը:
Նա հավելեց, որ նման բան երբևէ Հայաստանում չի եղել,- «Այսպիսի բան երբևէ չի եղել ո՛չ Հայաստանում, ոշչ արտասահմանում, որ մարդ 7 տարի չաշխատի, և նրան Պետական եկամուտների կոմիտեն 6 միլիոն դրամ գումար վճարի, բացի դա՝ այժմ էլ 3600 եվրո՝ որպես բարոյական վնասի փոխհատուցում»:
Նշենք, որ Ռոբերտ Նիկողոսյանը 2009 թվականին ազատվել է Քանաքեռ-Զեյթուն հարկային տեսչության իր զբաղեցրած պաշտոնից, ինչից հետո Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը աշխատանքից ազատման որոշումն անվավեր ճանաչել և հրահանգել վերականգնել նրան նախկին պաշտոնում և փոխհատուցում տրամադրել:
ՄԻԵԴ-ի կայացրած վճռում նշվում է, որ դատարանի վճիռն իրագործելու համար համապատասխան քայլեր չեն ձեռնարկվել, քանի որ Նիկողոսյանը չի վերականգնվել իր նախկին պաշտոնին, իսկ իր հարկադիր բացակայության համար սահմանված փոխհատուցումը (10.506.871 դրամ) վճարվել է մասամբ:
Ըստ Եվրոպական դատարանի վճռի՝ 2009 թվականի օգոստոսի 11-ի դատավճիռը, որը բարենպաստ էր հայցվորի համար, հինգ տարի չի կիրառվել, իսկ իշխանությունները չեն պատճառաբանել այդ հետաձգումը: Դատարանը համարել է Հայաստանի իշխանությունները, չկարողանալով ձեռնարկել անհրաժեշտ միջոցները վճիռն իրագործելու համար, խախտել են կոնվենցիայի հոդվածները:
Դատարանը մերժել է հայցվորի պահանջը նյութական վնասի փոխհատուցման հարցում՝ պատճառաբանելով, որ նյութական վնասի փոխհատուցման անհրաժեշտություն չկա՝ մասամբ վճարված լինելու հիմքով:
Համաձայն ՄԻԵԴ վճռի՝ խախտվել է արդար դատաքննությանն առնչվող Մարդու իրավունքների եվրոպական կոնվենցիայի 6-րդ հոդվածի 1-ին կետը և սեփական գույքից անարգել օգտվելու իրավունքին առնչվող 1-ին արձանագրության 1-ին հոդվածը:
Մարդու իրավունքների եվրոպական դատարանը Հայաստանին պարտավորեցրել է վճարել 3.600 եվրո՝ որպես ոչ նյութական վնասի փոխհատուցում: