Անդրե Սանթրոսյանը՝ Շաշկու ՀՀ գավաթի անդրանիկ մրցույթի հաղթող (լուսանկարներ)
Մայիսի 9-ին Երևանում տեղի ունեցավ մինչև 12 տարեկանների ռուսական շաշկու (64 վանդականոց) ՀՀ գավաթի անդրանիկ մրցույթը: Ստուգատեսում հանդես եկան աննախադեպ մեծ քանակի՝ 47 շաշկիստ, որից 42-ը Երևանի տարբեր դպրոցների և 5-ը ՝ Արագածոտնի մարզի Աշտարակի (մարզիչ Ժաննա Բոնդարևա ) Վարդգես Պետրոսյանի անվան հիմնական դպրոցի աշակերտներն էին:
Շվեյցարական մրցակարգով ՝ 8 տուրով ընթացած ստուգատեսը մասնակից 37 պատանիների ու10 աղջիկների շրջանում շատ մեծ խանդավառությունն ու ոգևորություն էր առաջացրել: Բացի սահմանված մրցանակներից, մասնակիցներին իրենց ցուցադրած արդյունքներին համապատասխան մարզական կարգերը լրացնելու հնարավորությունն էր ընձեռնված:
Թեժ ու լարված մթնոլորտում ընթացած ստուգատեսում 8 հնարավորից վաստակած 6,5 միավորով Մ12 տարեկանների շաշկու ՀՀ գավաթի անդրանիկ խաղարկության գավաթակիրն ու հաղթողը դարձավ և պատվավոր գավաթը, ոսկե մեդալը, համապատասխան հավաստագիրն ու նվերները ստացավ՝ Անդրե Սանթրոսյանը, ով նաև նման կարգի մրցաշարերի համար բավական դժվարին մի խնդիր ևս կատարեց՝ մարզական 1-ին կարգ լրացրեց:
6-ական միավորով 2-6-րդ տեղերը կիսեցին 5 շաշկիստներ, որոնց թվում էր նաև այս տարիքային խմբի 2017թ Երևանի փոխչեմպիոնուհի, Երևանի մարզատրամաբանական խաղերի մանկապատանեկան մարզադպրոցի սանուհի՝ Երևանի Վահան Տերյանի անվան 60 -րդ հիմնական դպրոցի 6-րդ դասարանի աշակերտուհի Կարինե Մորյանը (մարզիչ Ալբերտ Պողոսյան):
Արծաթե և բրոնզե մեդալակիրներին որոշելու համար, այս հնգյակի միջև շրջանաձև մրցակարգով լրացուցիչ մրցաշար անցկացվեց, որտեղ յուրաքանչյուր մասնակցին պարտիայի համար տրվում էր 10-ական րոպե: Այս փուլում իրենց լավագույնս դրսևորեցին ու արծաթե և բրոնզե պարգևներին արժանացան՝ Ֆելիքս Թոխյանն ու Գեորգի Աչոյանը:
Նկատենք, որ այս անգամ ևս պատանիների մրցաշարի բոլոր 3 մրցանակակիրներն էլ «Ուսում» հանրակրթական դպրոցի (տնօրեն Սուսաննա Թամարյան) սաներն էին, որոնք հանդես եկան ներկայումս շաշկու հանրապետության ամենալավագույն մասնագետի, ՀՀ բազմակի չեմպիոն, սպորտի վարպետ Նշան Ալավերդյանի ղեկավարությամբ: Նա, ի դեպ, այս մրցաշարի գլխավոր նախաձեռնողներից մեկն էր: Իսկ 1-6-րդ տեղերը զբաղեցրածների շարքում Կարինե Մորյանից բացի մյուս 5 շաշկիստները նույնպես <Ուսում> դպրոցի սաներն էին:
Մրցանակակիրների եռյակում տեղ գտած շաշկիստներից բացի սկզբունքային և լարված մրցապայքարում լրացուցիչ մրցաշարում գրացած արդյունքներն հաշվի առնելով ոչ պակաս գովեստի են արժանի նաև համառություն և ջանասիրություն դրսևորած 4-6-րդ հորիզոնականները զբաղեցրած 3 շաշկիստները՝
4.Կարինե Մորյան,
5.Արեգ Ալանայան,
6.Հայկ Ասատրյանը:
Աղջիկների մրցապայքարում լավագույն եռյակում տեղեր զբաղեցրին համապատասխանաբար՝
1.Կարինե Մորյան (մարզիչ` Ալբերտ Պողոսյան), Երևան, թիվ 60 դպրոց՝ 6միավոր,
2.Սոֆյա Հարությունյան (մարզիչ՝ Ժաննա Բոնդարևա), Աշտարակ, Վ.Պետրոսյանի անվան դպրոց՝ 5,5 միավոր,
3.Մարիամ Պետրոսյան (մարզիչ` Նշան Ալավերդյան), Երևան, թիվ 64 դպրոց՝ 4 միավոր:
Նրանց ևս հանձնվեցին մեդալներ , հավաստագրեր ու նվերներ: Ստուգատեսի մասնակցիներից 15-ը մարզական տարբեր կարգեր լրացրին, իսկ 10-ն էլ իրենց ունեցած մարզական կարգերը բարձրացրին:
Պատրաստեց՝ Արամ Ուգուջյանը: