Ինչո՞ւ են ՀՀԿ-ականները խուսափում հրապարակային դեբատներից

«Ժողովուրդը» գրում է. «Երևանի ավագանու ՀՀԿ ցուցակը գլխավորող Տարոն Մարգարյանը երեկ, հերթական անգամ ստիպված լինելով պատասխանել ընդդիմադիր թեկնածուների հետ բանավեճից հրաժարվելու մասին հարցին, լրագրողներին ասել է. «Մեր կատարած աշխատանքը, մեր ծրագրերը, մենք մեր ժողովրդին ենք ներկայացնում, բանավեճով չենք ներկայացնում: Բանավեճն ինձ համար… Ես զարմանում եմ, որ անընդհատ նույն հարցն եք տալիս»:

Նկատենք, որ հանրության համար էլ խիստ զարմանալի է այն հետևողական մերժողականությունը, որ ՀՀԿ-ականները դրսևորում են հրապարակային բանավեճի յուրաքանչյուր հրավերի կապակցությամբ: Հիշեցնենք, որ նույն պատկերն էր վերջին խորհրդարանական ընտրությունների շրջանում, երբ ՀՀԿ-ական կարկառուն դեմքերն այդպես էլ որևէ հրապարակային դեբատի չմասնակցեցին՝ դրա համար ներկայացնելով տարատեսակ պատճառաբանություններ:

Անշուշտ, հենց այսօր Սահմանադրական դատարանում ներկայացվող բազմաթիվ ընտրախախտումների վերաբերյալ փաստերը ցույց են տալիս, որ իշխանությունները կանխավ արդեն վստահ էին իրենց հաղթանակում, և հանրության համակրանքը նաև բանավեճերի միջոցով շահելու կարիք առանձնապես չէին տեսնում: Առավել ևս, որ կար շատ մեծ ռիսկ, որ հրապարակային դեբատների մասնակցելու դեպքում կարող էր ստացվել լրիվ հակառակ պատկերը»:

Մանրամասները՝ «Ժողովուրդ» թերթի այսօրվա համարում: