Ֆրանսիան պետք է յուրաքանչյուր հնարավորության դեպքում Թուրքիային ասի, որ դա Ցեղասպանություն է եղել. Օլանդ
Մենք չպետք է նահանջենք Հայոց ցեղասպանության ժխտումը քրեականացնելու ճանապարհից։ Այս մասին նշել է Ֆրանսիայի նախագահ Ֆրանսուա Օլանդը՝ Ֆրանսիայի հայկական կազմակերպությունների համակարգող խորհրդի կողմից Փարիզում կազմակերպված միջոցառման ժամանակ, որը նվիրված է Հայոց ցեղասպանության 102-րդ տարելիցին։
«Դա իմ պարտքն էր գալ այստեղ ու հարգել Հայոց ցեղասպանության զոհերի հիշատակը։ Մենք պետք է միշտ համախմբված լինենք ողբերգության մասին հիշատակի համար պայքարում»,- նշել է Օլանդը։
«Դա պայքար է, որի նպատակն է հերքել պատմական ճշմարտության ցանկացած խեղաթյուրում։ Ֆրանսիան համերաշխ է հայ ժողովրդի հետ, ինչը ես ապացուցել եմ Հայաստան կատարած իմ այցելության ժամանակ։ Միայն պատմական ճշմարտությունը կարող է միավորել։ Ես պետք է ասեմ, որ մենք չպետք է նահանջենք Ցեղասպանության ժխտման քրեականացման ճանապարհից։ Ժխտումը ոչ թե տեսակետ է, այլ ճշմարտության ժխտում»։ Օլանդի խոսքով Ֆրանսիան պետք է յուրաքանչյուր հնարավորության դեպքում Թուրքիային ասի, որ դա եղել է Ցեղասպանություն ու որ այն պետք է ճանաչել։
Օլանդը հայտնել է, որ Հայոց ցեղասպանության հարցով արխիվ է ստեղծվելու։ «Աշխարհում մարդու իրավունքների բազմաթիվ խախտումների պայմաններում այս օրը, ապրիլի 24-ը, մեզ հիշեցնում է այն մասին, որ մենք պետք է գործենք»։ «Իմացեք, որ հայ ու ֆրանսիացի ժողովուրդների միջև անքակտելի կապ կա, եղբայրական կապ»։