Միացյալ Նահանգները ողջունում է ՀՀ գլխավոր դատախազի հայտարարությունը՝ կապված «ՍԱՍ» գրուպի ձայնագրության հետ
Հայաստանում ԱՄՆ դեսպանատունն անդրադարձել է նախօրեին «Hayastan24»-ի կողմից հրապարակված ձայնագրության հիման վրա ՀՀ գլխավոր դատախազի այսօրվա հայտարարությանը, ըստ որի՝ դեպքի առթիվ քննություն է տարվել:
ԱՄՆ դեսպանատան տարածած հաղորդագրության մեջ ասվում է. «Վերջերս կայացած խորհրդարանական ընտրություններից հետո ԱՄՆ-ի և միջազգային կառույցների կողմից հայտարարություն եղավ, որում նշվում էր, որ ընտրական գործընթացների վրա բիծ են թողել քվեներ գնելու և ընտրողների նկատմամբ ճնշումներ գործադրելու մասին արժանահավատ հաղորդումները:
Հայտարարությամբ մենք Հայաստանի կառավարությանը, կուսակցություններին ու քաղաքացիական հասարակությանը հորդորում էինք աշխատել միասին՝ գոյություն ունեցող կամ նոր իրավակիրառ մեխանիզմների միջոցով փարատելու այդ մտահոգությունները, և մենք ողջունում ենք Գլխավոր դատախազի այսօրվա հայտարարությունը, որ «Hayastan24»-ի կողմից կարճ ժամանակ առաջ հրապարակված խիստ մտահոգիչ նյութի հիման վրա քննություն է սկսվել:
Այս բնույթի արժանահավատ ու թափանցիկ քննությունները համահունչ են փետրվարի 9-ին վարչական ռեսուրսի օգտագործման դեմ վարչապետի հնչեցրած նախազգուշացման հետ:
Մենք հավատացած ենք, որ կառավարությունը կապահովի, որպեսզի չլինեն հակընդդեմ մեղադրանքներ կամ հաշվեհարդար որեւէ անձի կամ կազմակերպության դեմ, որը քննության կներկայացնի արժանահավատ տեղեկություններ»:
Ավելի վաղ «Hayastan24» կայքը հրապարակել էր «ՍԱՍ» գրուպում տեղի ունեցած նախընտրական ժողովներից մեկի ձայնագրությունը, որում վարողը աշխատակիցներին պարտադրում է ձայներ բերել ՀՀԿ տարածքային թեկնածու Արտակ Սարգսյանի օգտին՝ հակառակ դեպքում սպառնալով ազատել աշխատանքից:
Ավելի վաղ ՀՀ գլխավոր դատախազությունից ԶԼՄ-ներին հայտնի դարձավ, որ ուսումնասիրվում է համացանցում հայտնված սկանդալային ձայնագրությունը: