Իմ ծնունդը ամեն օր է. Գալուստ Սահակյանն արդեն 69 տարեկան է (տեսանյութ)
Այսօր լրանում է ՀՀ Ազգային ժողովի 10-րդ նախագահ Գալուստ Սահակյանի ծննդյան 69-րդ տարին:
Գալուստ Սահակյանը ծնվել է 1948 թ.-ի ապրիլի 8-ին` Երևանում: 1971 թ.-ին ավարտել է ԵՊՀ բանասիրական ֆակուլտետը: Բուհն ավարտելուց հետո՝ 1970-1972 թթ.-ին աշխատել է Երևանի մետաքսի կոմբինատում որպես փականագործ:
1972-1991 թթ.-ին աշխատել է կրթական համակարգում, մասնավորապես, Երևանի թիվ 30 դպրոցում որպես ուսուցիչ, թիվ 94 և թիվ 153 դպրոցներում՝ տնօրենի տեղակալ, թիվ 3 և թիվ 185 դպրոցներում՝ տնօրեն:
ՀՀԿ նախագահի տեղակալն իր քաղաքական գործունեությունը սկսել է 1992 թ.-ից՝ որպես Երևանի Մաշտոցի շրջխորհրդի գործկոմի նախագահի տեղակալ, ապա առաջին տեղակալ:
1995 թ.-ից մինչ 2014 թ.-ը Գալուստ Սահակյանը եղել է Ազգային Ժողովի պատգամավոր:
2014 թ. ապրիլի 29-ին ձայների 101 կողմ, 3 դեմ հարաբերակցությամբ ընտրվել է ՀՀ Ազգային ժողովի նախագահ:
* * *
Բացի հասարակական-քաղաքական հարուստ գործունեությունից, ԱԺ 10-րդ նախագահն առանձնանում է նաև իր կողմից հնչեցված առավել հիշարժան արտահայտություններով, որոնք, կարելի է ասել, հանրության շրջանում «թևավոր խոսքեր» են դարձել:
Դրանցից մի քանիսը ներկայացնում ենք ստորև՝
1. Եթե ցուցակում էլ չլինեմ, իմ տեղն այնպիսին է, որ մշտապես կա:
2. Բիզնես ունեցողը դեռ բիզնեսմեն չէ:
3.Դեմ լինելը դա ընդդեմը չէ:
4.Գաղտնի բառը դա թաքուն բառը չէ:
5. Ցմահ կլինի մահապատիժը:
6. Քաղաքականության մեջ էգ և որձ չկա:
7.Չափներդ ճանաչեք: Չափից եթե դուրս եք գալիս, անչափ չեք դառնում:
8. Հայաստանում կոռուպցիա չկա, կաշառակերություն կա:
9. Ես ձեր մերկությունը լավ եմ տեսել և երբեք չեմ գայթակղվել:
10. Լուրջ մարդկային փոխհարաբերություններում բոլորը պետք է փոխհարաբերվեն:
11.«Ոչ» արտահայտություն չկա, դա «չէ»-ն է, իսկ «չէ» նշանակում է «ոչ էական»:
12. Երևի սովորական պատգամավոր կլինեմ, բայց դե բնական է, սովորական չեմ լինի էլի: