Հերմինե Նաղդալյանը Վալենտինա Մատվիենկոյին Հայաստանում արտադրված պլանշետ է նվիրել
Սանկտ-Պետերբուրգում ընթացող ԱՊՀ միջխորհրդարանական վեհաժողովի գարնանային նստաշրջանի աշխատանքների շրջանակում մարտի 28-ին ՀՀ ԱԺ փոխնախագահ Հերմինե Նաղդալյանը հանդիպել է ՌԴ ԴԺ Դաշնության խորհրդի նախագահ Վալենտինա Մատվիենկոյի հետ:
Հանդիպման ընթացքում քննարկվել են երկու խորհրդարանների գործընկերային հարաբերությունների խորացման, միջազգային հարթակներում փոխշահավետ համագործակցության, ԵԽԽՎ, ԵԱՀԿ, Միջխորհրդարանական միության պատվիրակությունների գործունեությանը վերաբերող հարցեր:
Երկուստեք կարեւորվել է ՀՀ Ազգային ժողովի եւ ՌԴ Դաշնային ժողովի միջեւ համագործակցության միջխորհրդարանական հանձնաժողովի գործունեությունը՝ ընդգծելով, որ երկու երկրների հարաբերությունների զարգացման, հատկապես միջխորհրդարանական կապերի ամրապնդման գործում նշանակալի է միջխորհրդարանական հանձաժողովի դերը, որի աշխատանքները տարեցտարի դառնում են ավելի ակտիվ ու արդյունավետ:
Զրուցակիցներն անդրադարձել են ՀՀ-ի և ՌԴ-ի միջև դիվանագիտական հարաբերությունների հաստատման 25-ամյա հոբելյանին և գոհունակություն հայտնել այդ ժամանակահատվածում տարբեր ոլորտներում երկկողմ համագործակցության դինամիկ զարգացման կապակցությամբ, ընդգծել երկու երկրների փոխհարաբերությունների զարգացման ներկա բարձր մակարդակը:
Այս համատեքստում անդրադարձ է կատարվել նաև ԱՊՀ ՄԽՎ հոբելյանական նիստին և Վեհաժողովի անցած ճանապարհին, կարեւորվել այդ տարիների ընթացքում մոդելային օրենսդրության ստեղծման և զարգացման աշխատանքները, միջազգային խորհրդարանական կապերը և շփումները, մոնիթորինգային, մշակութային համագործակցության ընդլայնումը, խաղաղարար գործունեությունը, որի արդյունքն է 1994 թ. կնքված եռակողմ պայմանագիրը՝ ստորագրված Լեռնային Ղարաբաղի, Հայաստանի և Ադրբեջանի կողմից:
ՀՀ ԱԺ փոխնախագահ Հերմինե Նաղդալյանը ևս մեկ անգամ ընդգծել է Հայաստանի դիրքորոշումը հակամարտությունների խաղաղ կարգավորման վերաբերյալ՝ նշելով, որ Հայաստանն ընդունում է Մինսկի խմբի 3 սկզբունքները և կարևորում համանախագահների, այդ թվում՝ ՌԴ ջանքերն Արցախի խնդրի արդարացի և խաղաղ լուծման ուղղությամբ: Տիկին Նաղդալյանը դատապարտել է Ադրբեջանի արկածախնդիր քաղաքականությունը՝ հիշեցնելով ապրիլյան չորսօրյա պատերազմի՝ Ադրբեջանի կողմից սանձազերծած ռազմական արկածախնդրության մասին:
Զրույցի ընթացքում կողմերը շոշափել են նաեւ ԵԱՏՄ շրջանակում տնտեսական հարաբերությունների զարգացմանն առնչվող խնդիրներ, hույս հայտնել, որ տնտեսական արագընթաց զարգացում կարձանագրվի:
Այս համատեքստում ՀՀ ԱԺ փոխնախագահը հանգամանորեն ներկայացրել է Հայաստանի տնտեսական զարգացումները և տիկին Մատվիենկոյին նվիրել Հայաստանում արտադրված պլանշետ, որը զարմացրել և անչափ ոգևորել է ՌԴ ԴԺ Դաշնության խորհրդի նախագահին, ով խոստացել է աշխատանքի ընթացքում անպայման օգտվել հայկական արտադրության ժամանակակից սարքից: