Ինչո՞ւ մենք պետք է վիճենք կամ կռվենք Ադրբեջանի կամ Հայաստանի հետ. Լուկաշենկո
Ինչո՞ւ մենք պետք է վիճենք կամ կռվենք Ադրբեջանի կամ Հայաստանի հետ: Բելառուսի նախագահ Ալեքսանդր Լուկաշենկոն նման հարց է հնչեցրել մարտի 28-ին Մինսկում Հայաստանի Հանրապետության դեսպան Արմեն Խաչատրյանի հետ Բելառուսում վերջինիս դիվանագիտական առաքելության ավարտի կապակցությամբ կայացած հանդիպման ժամանակ: Այս մասին հայտնում է Բելառուսի նախագահի մամուլի ծառայությունը:
Լուկաշենկոն ընդգծել է, որ և՛ Բելառուսը, և՛ Հայաստանը որպես երկու պետություններ միևնույն դիրքորոշումն ունեն միջազգային օրակարգի բոլոր հարցերի վերաբերյալ: «Մենք միանգամայն հասկանում ենք այն քաղաքականությունը, որը վարում է Հայաստանի ներկայիս ղեկավարությունը, և որը վարել է նախկին ղեկավարությունը»,- ասել է նա:
Բելառուսի նախագահն ասել է. «Կան սուր հարցեր հայերի, բելառուսների մոտ: Ենթադրենք՝ Լեռնային Ղարաբաղը: Ձեզ ուղղակի կասեմ՝ այն մեր հարցը չէ, այն իմ հարցը չէ: Մենք այնտեղ անելիք չունենք: Կան հակամարտող կողմեր, որոնք պետք է պարզեն այդ հարցը»:
Լուկաշենկոն հավելել է, որ Արցախյան հակամարտության հարցում Բելառուսի դիրքորոշումը միանշանակ է:«Եթե նրանք կցանկանան երաշխավոր երկիր, նրանք երկուսով թող որոշեն: Այսօր կա նման պահ այդ հարցը լուծելու համար»,- ասել է նա:
Բելառուսի նախագահն անդրադարձել է նաև բլոգեր Ալեքսանդր Լապշինին Ադրբեջան արտահանձնելու հարցին:
«Հիշում եք Լապշինին: Լսեք, ի՞նչ կապ ունի այստեղ Հայաստանը: Հայաստանն ինձ Լապշինի մասին երբեք ոչինչ չի ասել: Նրա նկատմամբ հետախուզում է հայտարարել մեկ երկիր՝ Ադրբեջանը: Երբ նա այստեղ ձերբակալվեց, ես մտածում էի՝ ինչո՞ւ նրան այստեղ ձերբակալեցին: Թող գնար՚ ուր ուզում էր: Բայց ձերբակալեցին: Ինտերպոլը գիտեր: Մենք հայտնեցինք, ինչպես և սպասվում էր, ինչպես օրինապահներ: Ո՞ւմ մենք պետք է նրան փոխանցեինք: Պետք է փոխանցեինք նրան, ով նրա նկատմամբ հետախուզում էր հայտարարել»,- ասել է նախագահը:
Լուկաշենկոն նաև ասել է, որ «Լապշինին ոչ ոք չէր էլ ուզում վերցնել»:
«Ես առաջին անգամ եմ ասում սա Ձեզ և հրապարակայնորեն. նրան ոչ ոք չէր ուզում վերցնել: Հետո միայն սկսեցին խաղացնել այդ քարտը: Նա երեք երկրների քաղաքացի է, ոչ մի երկիր նրան հետ չի պահանջել»,- նշել է Լուկաշենկոն: